L’Angolo de la Wanda – Marzo bis 1997 – “LA  CASA  DE  BEATRICE”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“LA  CASA  DE  BEATRICE”

L’èra l’ano de grassia 1324 e a Soave, destesa tra le so verdi bine che za inprometéa un mar de graspi de oro, la vita scoréa serena e operosa sóto l’ala del castel postà, co-fà ‘na corona, sul monte Tenda. Par catarse ‘brassà da la cinta muraria volù da Cansignorio, la bela çitadela medioeval l’avarìa dovù spetar çinquant’ani ma ‘dèsso, in quela matina de magio, sóto la signoria de Cangrande I°, gnente la spartia dai campi in fior ch’i paréa rugolar, zó… zó, verso la çità distante.
Dove ancó gh’è la via Roma che da Porta Verona ména al palasso del Capitanio, al n° 17 esiste ancora la casa de BEATRICE BONACOLSI.
L’èra,’sta quà, al tempo, ‘na splendida fioléta de quindes’ani; longhi cavéi biondi che la usava intressar con fili de perle e oci cusì trasparenti ch’i paréa finestre vèrte su ‘n’anima limpida come ‘l ciel a l’aurora, quan’ che l’aurora l’è serena.
Só papà l’èra uficial de la guardia d’onor de Federico de la Scala, conte de Valpolesèla e de Soave e la mama, Anna Consalvi, l’èra  dama de corte de Imperatrice de Svevia, Signora del castel.
Ma BEATRICE, co’ la vecia bàila, la vivéa lì, in quel palasseto incassà tra le pòre case dei bacàni, sonando el liuto, ricamando, lesendo le sacre scriture e, come tute le butéle, sognando l’amor.
S’èra a la tersa dominica de magio… e tuto el borgo spetava, in farmento, la visita del Signor de Verona, cusin de Federico.
Da drio i veri, anca BEATRICE, a gola strucà, la spiava l’evento.
Ed èco un son de trombe anunçiar el corteo! Cangrande, in vesta dorada, a caval, con a fianco l’amigo e consilier, “el divìn poeta” Dante, lentamente l’è passà pa’l borgo, tra i aplausi de la jente e subito el cor de la butèla el g’à ‘vù un strucon; l’èra cusì belo, nel vigor dei so 33 ani!
I rissi castagni che ghe sbrissiava ribèli fóra dal capel piumado, de veludo, e un soriso luminoso da eclissar el sol, rivolto propio a tuti, siori e pitochi… veci e buteleti e, par ‘n atimo, anca a éla!
Quela sera, par la prima òlta, BEATRICE l’è ‘sta invità a la festa. Sentà viçin a la mama la guardava a boca verta el Signor de Verona  a capotòla e la sentiva l’amor créssarghe drento sempre più  impetuoso come l’Adese quan l’è in piena. Intanto i musici i avéa tacà el balo del “sgulmarin” e ‘l so Cangrande, tuto d’un colpo, la se l’à catà, lì davanti, a invitarla a balar. Gh’à parso che tuti i lumi del salon i se fusse trasformadi in stele e la g’avéa l’impression de no’ tocar gnanca tera eseguendo, una a una, le vece movense, tra un soriso e un inchin.
Quela note BEATRICE, persa in un sogno, la l’à fata bianca!
Ma Cangrande che l’èra restà incantà da ‘sta fresca belessa, la sera dopo, co’ l’aiuto interessà de la bàila, traverso la vecia galeria che dal castel portava al borgo, l’è andà a catarla.
Ela la stava sonando el so liuto quando che lu, silensioso, el se g’à ‘viçinà postandoghe su la spala ‘na man inanelada no’ la s’à spaentà… la lo amava da tanto tempo. Nissun savéa che drento un scrigneto la conservava ‘na medàia co’ l’efige del so adorado principe; un’ efige su la qual l’avéa creà tuto un mondo de sogni. E proprio a lu la ghe l’à confidà, faséndoghe védar el so segreto tesoro, nel mentre che nel vardàrlo, lì, davanti, finalmente vero, la pianséa de passion e d’emossion.
Propio alora da la cesa viçina la campana l’à sonà l’Ave Maria.
Quei bòti i à sveià come da’n sòno Cangrande. Nò, no’l se l’à sentì de profanar quel’amor cusita belo e neto. Epura no’ gh’èra mai sucesso prima de rinunçiar a ‘na conquista!
El s’à sfilà dal déo l’anel più pressioso postàndolo nel cofaneto insieme a la medàia. Pò’ l’à basà la man de BEATRICE, el s’à inchinà e l’è andà via, cusì, sensa rimpianti, ansi, senténdose forte piassè de quando l’avéa vinto la più fadigosa de le batàlie.
BEATRICE l’èra restà sentada sul sgabel, spartìa tra gioia e feliçità. La sentiva che no’ l’avarìa podù mai èssar ne la vita de qualchedun altro, se non del so bel principe. E l’à rifiutà tuti i partiti… e l’à dito che la voléa farse mònega, pura l’à seguità a coltivar nel giardineto del cor… la speransa!
Çinque ani dopo, el 22 de luglio del 1329, Cangrande el moriva nel vescovado de Treviso e quando la bruta notissia l’è rivà anca a Soave, qualche matina dopo la bàila che l’èra andà par svejàr la so paronçina par la messa, la l’à catà, bianca come el cao-de-late, morta sul leto con su la boca un dolçe soriso e streti ne le mane, ‘na medàia co’ l’efige de Cangrande e un anel pressioso.
Su la coèrta; un capel de veludo, piumado e… tuto intorno par la càmara, un legero… legero… profumo de sgulmarin.

Wanda  Girardi  Castellani

***

(sgulmarin-rosmarino)

El balo del sgulmarin-vecia balada
nominà anca da Berto Barbarani nel
so poema “Giulieta e Romeo”.