L’Angolo de la Wanda – Marzo bis 1998 – “‘NA “COLEGA” ASSE’ BATALIERA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“‘NA “COLEGA” ASSE’ BATALIERA”
“Quando Matilde Serao, afiancà da Angelo Dall’Oca Bianca e Berto Barbarani, l’à dichiarà guera ai futuristi par difèndar la piassa Erbe e el ghèto de Verona”.

“Coréa” (a piàn; parte a pié, parte a caval) l’ano 1913, quando, da le pagine del giornal “L’Arena”, al qual la colaborava, Matilde Serao, intervegnù nela cosideta “bèga del ghèto”, la se batèa come un leon, col pitor Dall’Oca e el poeta Barbarani, contro la demolission de la storica Corte Spagnola e par conservar, “ruspante”, anca la viçina, bela piassa dele Erbe, co’ la stessa passion che za l’avéa fata conóssar in altre batalie;
“Dopo tanti secoli Verona l’è da novo rosegà dai furori civili. No se-se taca più par do case (Capeleti e Montìcoli) ma par ‘na piassa! No, amiçi ideài de Verona, artisti insigni e miti gregari… dovì conbàtar parché el milion no’l g’abia da ‘vérla vinta su la fantasia…!” …parole sante e, specialmente ‘dèsso, quanto mai atuali.
De artisti contro, la Serao la ghe n’avéa ‘na barca e miga da catalogar tra i “miti gregari” se da Milan i futuristi (par i quai anca la ‘Réna la sarìa stà’ da demolìr… insieme al “ciaro de luna”) con Umberto Boccioni, Marinetti, Balla, Carrà, Pratella e soci, in testa, i telegrafava a “tuta maneta” congratulandosse de za, prima ancora che la roba la ‘ndasse in porto, con el Consilio Comunal de Verona par la “demolission dele massa venerade catapechie”.
Se sà che anca i futuristi veronesi, in guera vèrta contro i “conservadori” de la vecia Verona e so tradissioni, come Dall’Oca e Barbarani, i s’avéa schierà coi più ilustri “coleghi”; uno in particolar: el poeta-pitor Quirino Sacchetti… senpre pronto ala contestassion; via…, a testa bassa, come i moltoni!
La celebre, bataliera giornalista, l’èra zà stada ospite dela çità, in particolar a fianco de Eleonora Duse, so grande amiga, quando ‘sta qua, nel 1875, a soli 16 ani l’avéa recità in ‘Réna nela parte dela Giulieta shakesperiana; ‘na Giulieta memorabile dela qual D’Annunzio l’avéa scrito; “Ogni parola prima de vègnar fora da la so boca, l’è passà traverso el calor del so sangue”.
La Serao la gh’èra stà’ viçin, a la Duse, in ogni momento, belo come bruto e l’èra stà pura ela a assistarla de parto ne l’april del 1880 quando, a Marina de Pisa, sconta ai oci del mondo, l’avéa messo al mondo un butin, vissudo solo du giorni!
Matilde Serao, nata a Patrasso nel 1856 e morta a Napoli nel 1927, de papà italian e mama greca, l’è stà redatrice del coriere del Matino de Napoli e po’ colaboratrice del Fanfula, a Roma. Nel 1884 l’avéa sposà Edoardo Scarfoglio con el qual l’à fondà e direto el “Coriere de Napoli”.
Dopo èssarse separà dal marì, in seguito l’à pura fondà e po’ direto fin a la morte el “Giorno” de Napoli.
Giornalista validissima, come scritrice l’à savù disegnar sutili ritrati psicologici e coloridi bossetti, specialmente in çerte pagine napoletane come: “La virtù de Checchina” (1884), “El ventre de Napoli” (1884) “Adio amor” (1890), e “El paese de la cucagna” (1891).
Par i so tenpi l’è stà ‘na dona anticonformista e trasgressiva. Spesso, come l’à fato a Verona par el Ghèto e la piassa Erbe, l’à tacà sensa paura i potenti come quando, a fianco del marì africanista, romantico acanì, dela fassion “crispina”, el 27 setembre 1896, parlando del matrimonio del principe ereditario; futuro Re Vitorio Emanuele lll°, con Elena del Montenegro, la l’à definì “nosse co’ i fighi sechi”; un petegolesso che po’ Vitorio l’à smentì metendo al mondo ben 5 fioi. ‘Sta “bòta” al vetriolo però la gh’è costà la messa al bando da la corte fin al 1925 quando, in ocasion dele nosse dela principessa Mafalda con Filippo D’Assia, la gh’è stà’, dopo quasi 30 ani, finalmente riamessa.
La brìgola, ahimé, dei picoli scandali giornalistici la g’hè costà anca el premio Nobel che al posto suo i g’à conferì a Grazia Deledda; el presso più alto pagà da Matilde al puritanesimo de l’epoca, al qual la g’avéa ‘vù l’ardir de dar, a so modo, batalia.
A Matilde, comunque, noialtri veronesi dovemo, in bona parte, l’integrità de una dele nostre più bele piasse e de quel canton colorì de storia che l’è la “Corte spagnola” o …ghèto e “démoghe, donca, a Cesare quel che l’è de Cesare”.

Wanda Girardi Castellani