L’Angolo de la Wanda – Novembre 1997 – “1797 Bonaparte a Verona”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“1797 Bonaparte a Verona”

Vènardi 19 setenbre, s’à svolto nel bel cortil d’onor de Castelvecio, l’apertura a l’inaugurassion de la mostra “1797, Bonaparte a Verona”.
Davanti a un publico propio da grandi ocasioni à parlà el nostro Sìndaco Dr. Michela Sironi, el presidente de la Fondassion Cassa de Risparmio Dr. Paolo De Biasi, l’Assessor a la Cultura Dr. Darbi, el presidente del Comitato Sientifico Prof. GianPaolo Marchi e la diretrice del Museo de Castelvecio, Prof. Paola Marini. La mostra l’è stà alesti in sala Boggian (senpre nel corpo de Castelvecio) e la serarà i batenti l’11 de genar 1998, quindi, gh’è tuto el tenpo par vegnerla vedar. L’orario par i visitadori l’è da le 9 a le 19 continuado, (serà el luni) e l’ingresso el costa £.10.000 (ridoti £ 5.000 e par grupi £.8.000). Par informassioni e prenotassioni: tel. 045-8015435.
La mostra l’è stà alestì nel quadro de le manifestassioni in ocasion del bicentenario de le Pasque Veronesi e la riunisse material (quadri, documenti, medaie ecc…) relativo ai 12 ani de va-e-vien de le trupe napoleoniche nel veronese.
A dar ‘na man oltre che biblioteche, archivi, musei, pinacoteche, banche, fondassioni, curie, ecc…, italiane, se g’à messo anca musei, società; ecc… francesi e i restauri i è sta finansià oltre che da la Region Veneto e da la Fondassion Cassa de Risparmio, da diversi privati. Splendido el catalogo stanpà da Marsilio a cura de GianPaolo Marchi e Paola Marini.
Tra le çentenara de opere esposte: i ritrati de i protagonisti, l’iconografìa napoleonica, tra la qual un monumental busto del “Còrso” de G. Cracchi e do opere del Canova. Po’: 15 de i 80 aquarei riguardanti le batalie sul nostro teritorio, 50 medaie, splendidi quadri ecc… ecc… Ma l’è mèjo che ve lassa el piaser de scoprir da soli, vegnendo qua, tuti i tesori de ‘sta interessantissima mostra.

Wanda Girardi Castellani