L’Angolo de la Wanda – Novembre 1998 – “I Cristi de le Clarisse”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“I Cristi de le Clarisse”

Gioièi de la devossion popolare

La bela ceseta de Santa Chiara, in Veroneta (apunto, via Santa Chiara), l’è da ani serà al culto. Le erbasse le à oramai conquistà scalini e cortileto e le Clarisse le s’à trasferì a San Fidensio. Cesa e monastero i g’avea ‘vu el so massimo fulgor nel 1536 quando el vescovo Giberti el I’à consacradi. L’è ancora vivo nei abitanti de i dintorni el ricordo de quela campanèla argentina che spandea el so sono d’alarme quando el cel el se scuriva e distanti brontolamenti de ton i fasea presagir pericolosi temporài e tompeste rovinose. Al tintinar de la campanèla de le Clarisse fasea eco l’anticiclonica del canpanil de San Zen, e alora la brava gente de Verona la se fasea el segno de la croçe recitando: “Santa Barbara e san Simon, salvène da le site e dal ton”. Se po’ el tenporal el vegnea dal Trentin… pèso che pèso: l’èra “ladro e assassin”. Manco pericoloso quando inveçe el vegnea dal Mantoan, parche in ‘sto caso el se sarìa limità a bagnar “el gaban”. Ne la ceseta de Santa Chiara gh’èra, tra l’altro, un antico, miracoloso Crocifisso al qual era ligà ‘na bela storia: “Verona, 24 agosto 1605”.
Trenta ani fa essendo’ sto Cristo in casa del signor Alberto Sanguenè, un soldà tedesco che’l stava in casa par inparar la lengua italiana, no’l ghe fasea mai rivarensa. Rinprovarà, con ‘na “zarabotana” el g’à tirà le bale a le ganbe e el Crocifisso el l’à tirà-sù, come se vede. Morto el signor Sanguenè ‘sto Cristo l’è stà tegnù in devossion da so fiol canonico, po’ da la signora Virginia, moier del Sanguenè.
Ne l’ano 1605 regalà a le reverende Madri de Santa Chiara. Gesù mio, misericordia. Dopo serà la cesa de Santa Chiara, par un çerto periodo I’è stà conservà in quela viçina de Santa Maria in Organo, po’, no’ se sa gnanca quando, l’è partì par San Fidensio col so sèguito de cori votivi.
‘Pena che i oci i se ghe posta sora, subito i se fissa su le ganbe ransignade nel gesto de difesa da la “zarabotana” del soldà cruco. A vardar ben l’imagine no’ la ga gnente de artistico, ansi. I fedeli i l’à senpre credù de legno (cusì el l’à credù anca el Simeoni ne la guida de Verona) inveçe l’è de bonbaso. Ma ‘sta imagine de modeste dimensioni, serà in ‘na, ancor più modesta, nicia, l’à savù entrar ne l’anima de i veronesi de le passade generassioni, tanto che diversi, come mi, i è andà a San Fidensio par saverghene notissia.
Ancora se se dimanda par cosa no l’abia condiviso subito el destin de le Clarisse, stassionando inveçe par ani, da n’altra parte. Da buteleta, me ricordo, quel Cristo el ponzea la me fantasìa e restavo senpre a boca vèrta quando che i me alsava a l’altessa de la nicia par mostrarme drio el vero “Gesù co’ le ganbe ransignade”. Cissà come che’l s’à sentìo triste e sbandonà el Cristo del signor Alberto Sanguenè, ne i ani passà in Santa Maria in Organo, tra i tanti splendidi tesori d’arte che, come un scrigno pressioso, ‘sta cesa la serà. Forsi lu, cusì picenin, messo da banda in un coridor lateral, umile ne la sostansa… un fià sfilacià, sensa più le so moneghete a netarghe la nicia e inpissarghe i lumini, cissà-mai che le ganbe no’ l’abia, a la fin fine, ritirade par la paura e la solitudine! Ritrovàndose ‘desso in quel paradiso de l’èremo de San Fidensio, tra le piante secolari e sése de fiori, incapelà da ‘n cel che par no’l deva mai ingrugnarse; quel paradiso, dove le moneghete oltre a pregar le se dèdica a fini ricami, pressiosi dipinti, colonbe, Santi, Madone e angeli de cera, quela faceta nera de bonbaso, penso che la se sarà s-ciarada. Un’ultima roba: oltre al Cristo del Sanguenè, le Clarisse le ghe n’à anca n’altro molto venerà. L’èra conossù anca quel dovunque, tanto che ancora ‘desso tanti fedeli i conserva in casa drento a de le bossete l’oio de la lànpada che vejava el so sono. Un Cristo pure antico che le moneghete le à realisà passientemente, con proporsioni parfete, servendose de purificatòi fora uso. Dise la legenda che però, quando che le stà l’ora de farghe la facia le s’à fermà indecise e quasi spaentà dal dificile conpito. ‘Na matina però le l’à visto conpleto e a mètarghe sul col ‘na splendida testa intajà nel legno l’èra stà ‘na man misteriosa e miracolosa! Pàr quasi de vedarle; dopo ‘na note in bianco, tribulà dal pensier de quel Cristo sensa testa… cascar in zenocio sbalordide davanti al prodigio!
Naturalmente, anca ‘st’altra imagine miracolosa l’è emigrà, da Santa Chiara, a San Fidensio; ‘na mèta par ‘na maravejosa gita dominical, a du passi da la çità, sensa fadiga e, soratuto, sensa spesa.

Wanda Girardi Castellani