L’Angolo de la Wanda – Novembre 2000 – “LA STORIA NEL VANGELO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

LA STORIA NEL VANGELO

Fin da quando ero buteleta, me son sempre dimandà che significato le g’aveva çerte parole che sentivo dir dal prete durante la predica de la domìnica. Ci èreli, par esempio, i “scribi”, ‘i “farisei”, i “esseni” e via cusì! Ci-sà parcosa la Cesa la pensa che tuti se sapia propio tuto, opur, pèso ancora, ci-sà parcosa i pensa che no’ vaga la péna de spiegarse mèio, opùr, “de taiàrnela-zó”. Va ben che sémo el “grége”, overo “le pegore”, ma propio par questo, la predica la risultaria assè più interessante se la fusse un pocheto anca più istrutiva. Tanto par dirghene una, quando el soldà romano el g’à dà da béar a Cristo in croce co’ ‘na spugna imbombegà de asedo, no’ l’à fato altro che darghe quel che de norma el bevéa lú parché i romani quando che i andava in posti caldi e miga massa neti, i disinfetava l’aqua da béar propio co’ l’asedo.
Beh, a ‘sto punto, me son mèssa de bona voja a far ‘na picola ricerca, par mi e par quei che, come mi, gh’à voia de savérghene qualcosa de pì.
Dunque: “Vangelo” l’è ‘na parola che vièn dal greco e la vol dir “lieto anuncio”. El nome de Gesù, po’, el vol dir “el Signor salva”.
I libri del Nóvo Testamento, overo i Vangeli, adotà da la cesa e dei quai gh’émo solo dele copie, i è quatro :
Quel de Matteo, “el publicano”, scrito in aramaico nel 60/70 d.C., el ne rìva in ‘na stesura scrita in greco, forsi intorno a l’80 d.C.
Quel de Marco, discepolo de Piero, l’è in greco, scrito a Roma, nel 70 d.C.
Quel de Luca, discepolo de Paolo, scrito pura in greco, ne l’80 d. C. e quel de Giovani, scrito pura in greco dopo el 100 d.C. a Efeso. ‘Sti quatro Vangeli, riconossù da la Cesa, i è nominà “canonici”. Tuti i altri Vangeli in circolassion i è definì “apocrifi”. Gh’è da dir che el numaro dei manoscriti rivà fin a noialtri l’è enorme; circa 4680. Dai apocrifi ne riva i nomi dei Re Magi (Gaspare, Melchiorre, Baldassarre), el fato che Giusepe, marì de Maria, el fusse “vecio” e magari anca vedovo con fioi de prime nosse (e el sarìa questo el motivo che in qualche pagina del “canonici” se nomina i “fradèi de Gesù”) ecc…
E andemo ‘vanti.
In Palestina, ai tempi de Gesù, i “Farisei” i era i osservanti dele legi scrite o orali. Idem i “scribi” (dotori dela lege); gente pì che altro atenta a le esteriorità (vedi “sepolcri imbiancadi”).
I “Sadducei”, inveçe, i credea solo nei primi 5 libri dela Bibbia (Pentateuco). No’ i credea nela resurression, i era aristocratici e sacerdoti e i colaborava coi romani.
I “Zeloti” (uno dei capi l’èra Barabba) i era i nassionalisti, nemissi dei romani. L’unica autorità che i riconossea l’èra quela de Dio. Po’ gh’è i “Esseni”; quei che i passava la vita in orassión e i studiava la lege.
I “pubblicani” i era quei che tirava le tasse.
“L’olocausto” l’èra riferì a quando la vitima sacrifical la vegnea brusada par intiero (“olocausto” l’è stà quel dei ebrei nei forni tedeschi ne l’ultima guera).
Al sacerdossio ebraico podéa rivàr solo quei che faséa parte de la tribù dei Levi. Dopo el sacerdossio vegnéa el Sinedrio (71 membri), ‘na specie de consilio diretivo spartì in 3 grupi:
I principi, i ansiani del popolo e i scribi.
‘Sti ultimi, i g’avéa tanti poteri ma non quel de condanar a morte in Giudea.
Interessante anca saver come l’èra spartì el tempo .
El giorno el scominçiava ala sera e el finiva al tramonto.
El sabato ebraico, giorno del riposo, el scominçiava a la sera del vènardi e ‘sta quà la se ciamava “preparassion”. I altri giorni de la setimana, par rivar al sabato, i se ciamava co’l só numaro d’ordine: El 1° l’èra quel che noialtri ciamemo domìnica e cusì via. Par segnàr le ore del giorno se se riferiva ale quatro ore principali: 1° (le sié), 3a (le nove), 6a (le 12), 9a (le quindese) ciapando drento, con ‘sto nome, anca le dó ore che vièn dopo. La note l’èra spartì inveçe in quatro “vigilie” de tre ore l’una (‘sta parola, “vigilia”, la indicava i turni dele sentinele).
El mese l’èra calcolado in base a l’osservassion dele fasi de la luna e l’èra de 29 o 30 giorni, scominçiando da la luna nova.
L’ano, po’, l’èra fato de 12 mesi lunari ma ogni dó o tri ani se ghe infilava drento un 13° mese par ristabilìr l’acordo co’ la sucession stagionàl (cioè l’ano solare).
“Nisàn” l’èra l’8° mese del calendario ebraico, corispondente a marso-aprìl del calendario cristian.
Le feste i era sete: la Pasqua, primo dei 7 giorni dei “azzimi” (dal 15 al 22 de Nisàn, cioè dal plenilunio del primo mese: marso-april, che ricordava la fine dela schiavitù in Egito). Ne la note tra el 14 e el 15 Nisàn, se mangnava l’agnèl e par 7 giorni el pan non lievità.
Da la Pasqua, contando sete setimane, se rivava a “Pentecoste”; la festa ne la quàl se ofriva le primissie del pan fato co’ l’ultimo formento. In sta festa se comemorava anca la Lege dada da Dio sul monte Sinai.
La tersa grande festa l’èra quela de le “capane”, sie mesi dopo la Pasqua (setembre/otobre). ‘Sta festa, dita anca “del racolto”, la ricordava quando i israeliti i s’avea catà nel deserto, durante el viaio verso la tera promessa. Durante i 8 giorni de ‘sta festa se dovèa stàr de casa soto a de le capane de paia.
Gh’èra po’altre feste minori come; quela de la “dedicassion “, de “l’espiassion” (o kippur), quela de capodanno ecc…
Secondo i Vangeli, el Signor l’è morto a 33 ani ma ‘dèsso savemo che a causa de’n erór de calcolo fato dal frate Dionigi dito “el picolo”, Gesù l’è morto inveçe 6/7 ani più tardi, cioè verso la quarantina e ‘dèsso, alora, saressimo zà al 2006/7.
I libri de “l’antico testamento” i è: El Pentateuco o Legge (Genesi, Esodo, Levitico, Numeri, Deuterononomio).
I Libri storici. I libri sapiensiali o didattici. I libri profetici.
Ò anca scoperto che no’ l’è propio sbalià métar nel presepio el bombaso a simbolegiar la neve parché da quele parti gh’è el clima mediteraneo con qualche giorno de fredo e de neve.
Par ultimo; el Mar Morto el se ciama cusì parché, no’ avéndoghe emissari, el se scarica par via d’evaporassión; le só aque cusì le resta saladissime al punto che nissun pesse ghe pol vìvar. El lago de Genesaret, al contrario, l’è pescoso assè.
“ANO SANTO o GIUBILEO”: tra i ebrei l’èra l’ano de remission e liberassion. El ricoréa ogni 50 ani e gh’èra prescrito el riposo de la tera. I schiavi i vegnèa liberà e vegnèa condonà i debiti. Ne la cesa Catolica el Papa el concedea l’indulgensa ogni 25 ani (in principio ogni 100 e po’, ‘dèsso, ogni 50). I ani santi promulgà fin’ora i è stà 24. l’ultimo nel 1950 da Papa Pio Xll, Eugenio Pacelli.
Infine, tuti i lóghi dela Palestina ligà al cristianesimo, i è stà individuà da Sant’Elena, mama de Costantino, nel terso secolo d.C.

Wanda Girardi Castellani

Cesa catolica: costituì in forma monarchica, la se compone de 3 ordini El Papa, el clero, i fedeli.
La c.c. (sede in Vaticano) la basta a sè stessa. Le so congregazioni le fa tute le robe che ghe necessita. La g’à le so banche, i so giornai, le so TV, i so diplomatici ecc…