L’Angolo de la Wanda – Novembre 2002 – “PAR UN BIRON IN PIÙ”

…a cura di Graziano M. Cobelli

gcobelli05@gmail.com

Quatro Ciàcoe: da Verona

PAR UN BIRON IN PIÙ

A zontarghe un birón (piolo) a la scala; simbolo dei Scaligeri, l’è stà quel megalomane de Cansignorio, malà del cosideto “mal de la piera”.

La scala, larga de sóto e streta de sóra, che sinbolegia la signoria Scaligera che à governà Verona dal 1277 al 1387, la g’à ‘vudo in prinçipio quatro birói. E quatro la ghe n’à ‘vù anca sóto quel Can-Francesco, déto par la só magnificenza, generosità e braùra militare, “Cangrande”, capo dela lega Ghibelina e, par el volér de l’imperadór Enrico Vll, Vicario Imperiàl, che ai só tenpi l’à streto in un ideàl “bouquet” co’ la me Verona anca diverse çità dela Marca Trevisana, dela Lombardia, de l’Emilia e de la Toscana tanto che se no’l fusse morto a bonora l’avarìa de çerto realisà el sogno, condiviso co’ l’amigo Dante Alighieri, de unificàr sóto el só dominio tuto el resto de la penisola.
Pensè che se’l progeto el fusse andà in porto, inveçe de quela toscana la lengua nassionàl la sarìa deventà quela veneta!
Beh, dunque, a zontarghe ala scala un birón l’è stà’ Cansignorio che l’èra andà al potere, insieme al fradèl quindicenne Paolo Aboino, dopo aver ‘sassinà, el 14 dicembre 1359, in Sant’Eufemia, atiràndolo fóra da Castelvecio co’n trepo, el vintissetene fradèl Cangrande II°.
De ‘stó bruto episodio, par quei tenpi paraltro miga tanto raro, n’è rivà anca dei versi, scriti in latìn e in volgare e a rapresentàr mèio de tuti el sentimento general l’è stà’ Tommasuccio da Foligno, in ‘na “professia”:
“De Cani sonno descisci/ l’uno e l’altro fratello;/ de Chaim et d’Abello/ surgierà lo malo seme./ Ad Verona se viene/ sempre di tal dura carne;/ chomo de’ soportarne/ la divina justitia?”
Cansignorio, come emo dito, el g’avéa anca el mal de la piera, overo la costosa mania de far-su palassi, tóri, porte, lògie, strade, piasse e colonati. Tra l’altro l’à anca provedù ala costrussión del só mausoleo, più siór e inponente de quel de Mastino II°, afidandoghene l’esecussión ai maestri Campionesi e a Bonino da Campione che co’ le só maestranse el g’à laorà drio dies’ani.
Cansignorio, dunque, forsi par vanità, par distinguarse dai altri Scaligeri che l’avea precedù, o, più che altro, par dimostràr che sóto el só governo Verona l’èra destinà a andàr più in alto, (ad summa per gradus) l’à vossù alsàr la scala zontandoghe un quinto birón. Ma a dir la verità le robe no’ i è andà par el verso che’l sperava lu!
No’ l’è però che la sia sta del tuto sua la colpa dela fine dela Signoria, sucessa tredes’ani dopo la só morte, quando che i à parà-via só fiol Antonio, a opara dei Visconti.
A testimoniar el cambiamento sinbolico resta, par quanto riguarda la scala prima maniera, i du cani coronadi ai du fianchi de l’urna de Cangrande, l’inferiada dela porta d’ingresso ale arche e quela a quatro lati intorno al monumento de Mastino II°. Gh’è pura i stemi piturà ai lati de l’abside nela cesa de sant’Anastasia e un’urna nel chiostro de san Zen.
Çinque i è inveçe i birói, su le campane come quela dela tóre del Gardèl, opara del Maestro Jacopo (1370), dèsso al museo de Castelvecio e su le maie del “merleto” esagonàl che gira intorno a l’arca de Cansignorio. El quinto scalìn l’è stà’ adotà anca dale nostre istitussioni provinciali.
Gh’è da dir che i sucessori de l’ultimo grande “Signore” de Verona che forse l’avarìa pensà che i sarìa stà’ boni de alsàr ancora de più la scala, fedeli al moto, “nec descendere, nec morari”, inveçe che in su… i è andà definitivamente in zó.

Wanda Girardi Castellani