L’Angolo de la Wanda – Novembre 2004 – “L’è la Tor che rebàte”

…a cura di Graziano M. Cobelli

gcobelli05@gmail.com

Quatro Ciàcoe: da Verona

L’è la Tor che rebàte

Pier Zagata, ne le só cronache, el riporta che “Ne l’ano 1172 fu brusà tuta la çità de Verona e propio in quel’ano fu fato il fondamento de la tór dei signori Lamberti che s’à ciamà da mò “la tóre dele campane sóra el palasso de Verona”.
I Lamberti i g’avèa da èssar ‘na faméia pitosto siora par podér soportàr spese cusì grandi. Pecà che se ghe ne sapia poco, salvo che qualchedún de lori l’è stado podestà de Cerea nei ani 1202, 1204, 1210, 1212, e 1222. E sicome a l’alta carica del castel de Cerea l’èra usansa mandarghe potenti citadini veronesi, gh’è da imaginàr che i Lamberti, podestà de Cerea, i sia stà propio quei che à fato costruìr la Tór de la piassa Erbe. Paraltro sta famèia la g’à da èssarse estinta da un bel toco, a meno che no’ la se sia trasferì ci-sa ‘ndove parché no’ se ghe n’à savù più gnente e la tóre l’è passà de caratere publico, nominà nei ati uficiai “Turris Palacij Comunis Veronae” o “Turris a campanis” o “Turris major horarum”.
Altre notissie no’ ghe n’emo ‘vu. Se pensa però che la sia sta fata prima del palasso del Comune, ereto nel 1194.
Al principio l’èra de altessa pitosto modesta ma nel magio del 1403 un fulmine el g’à taià de neto la suca cusì po’, in ocasión dei necessari restauri, s’à deciso anca de alsarla fin ai atuai 83 metri.
I laori i è scomincià nel 1448 ma dies’ani dopo i andava ancora ‘vanti a bogonela par via che, dopo la spesa inissiàl de 3000 ducati, è vegnù a mancar i schei. Finalmente nel 1463 la tóre l’à tocà i definitivi 83 metri. Ma eco che nel 1652 un fulmine e pò’ ani dopo n’altro ancora i l’à da nóvo danegià e s’è dovudi rivàr al 1836 par la definitiva sistemassion fata da Luigi Fraizzoli.
La tór de piassa Erbe la se ciamava anca “Tor magior de le ore” pur no’ avéndoghe alora l’orolojo, parchè un campanàr el ghe dava i segnai dele ore co’ i rintochi de’na campana, dopo l’aviso de la tór del Gardello infondo a la piassa. Da questo è restà el deto “L’è la tór che rebate” riferì a ci ripete ‘na frase zà dita e ridita; tuto el contrario de “Paganini no’ ripete”.
Ne la Tór dei Lamberti gh’è dó canpane: el Rengo e la Marangona. De ‘sta qua se g’à notissia fin dal 1294 quando la sonava la fine del laoro. Ligà a ‘sta canpana gh’è ‘na legenda. I conta che ‘na siora gelosa del marì; un marangón de la piassa, la g’abia molà in testa a ‘na bela piassarota, durante ‘na processión, ‘na bala de piera destacà dal pontesèl. La “marangona”(overo la moiér del marangón) l’à dovù pagàr l’assassinio de la rivale con la spesa de ‘na canpana da alora ciamà apunto “la marangona”. Se sà che se no’ la fusse sta siora la g’avarìa rimesso inveçe la testa. Dal che se pol védar come che l’è sempre stà giusto el proverbio: “soldi e amicissia i sòfega la giustissia”.
La “marangona” oltre a segnàr le ore de tersa, nona, de l’Ave Maria ecc… “la sonava anca tuti i giorni festivi ale 22 par sveiàr i molinari a scominçiàr a masenàr la farina e ai fornari parchè i tacasse el forno.
El Rengo, l’è manco vecio de la Marangona. Dise le antiche cronache che “l’ano 1394, al 13 de febràr, fu facto el Rengo per Zanfrancesco da Legnago”. El nome derivà da “Arengo” el ne spiega le funsioni de sta campana: ciamàr el popolo a racolta sia par i avenimenti bei che par quei bruti. Fin a qualche ano fa, subito dopo la mesanote del 31 dicembre se usava tuti andàr fora a sfidàr el lispio (fredo ingiassà) par scoltàr la voçe profonda de ‘sta campana darghe el saludo al novo ano.
Secondo sempre le vecie cronache, el Rengo e la Marangona i è sta fuse e rifuse più olte; nel 1452, nel 1521, nel 1557.
Nel 1829 la Marangona l’èra stonà a causa de’n crepo. El consiglio Comunàl ne la seduta del 29 dicenbre de quel’ano l’à deliberà alora de rifòndarla doparando el metàl de ‘na canpana minore, par risparmiàr su la spesa. Quanto a l’orolojo, nel 1795, l’11 setembre, Giovanni Sacramoso l’à presentà al consiglio el progeto andà in porto nel 1798. In porto… se fa par dir, parché tra riparassioni, modifiche, dani causà da teramoti e vari tira e mola, l’orolojo de la tór dei Lamberti el g’à messo el só tenpo a rivàr a èssar stabile. Nel 1882 l’è stà finalmente sostituì co’ la spesa de 3800 lire, con quel che ancora podemo consultàr alsando i oci da la piassa, fabricà da Mannhardt de Monaco.
Dèsso la Tór de piassa Erbe, fornì de’n bel assensór, l’è un reciamo par i turisti che da là inçima i pol gòdarse el panorama de la bela Verona co’ la só rede stradàl in pianta romana, drio el Cardo e ‘l decumano e la cintura d’argento de l’Adese che, come dise el nostro Tolo Da Re, “co’ ‘na esse el la abrassa tuta!”

Wanda Girardi Castellani

(bibliografia: Lenotti T.-Dalla Corte G.)