L’Angolo de la Wanda – Novembre 2005 – “Anca Enrico Bernardi, el veronese pioniér de l’automobile, ‘dèsso el g’à un posto tra le stele”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

Anca Enrico Bernardi, el veronese pioniér de l’automobile, ‘dèsso el g’à un posto tra le stele.

El quarto, tra i 5, pianeti minori e asteroidi orbitanti tra Marte e Giove, la quàl scoperta l’è stà riconossuda (tra ‘na quindesina) e atribuì a me fiol Flavio dal Minor Planet Ephemeris: Query Results american, l’Ente che verifica e cataloga i corpi celesti, ‘dèsso el porta el nome de ‘n altro grande: Enrico Bernardi, veronese de soca, inventór dela prima automobile a bensina.
A dir la verità, çerti momenti, quando te te cati in ‘na coa de ore par rivàr al casél de n’autostrada o a ‘n semaforo, tabacando fumo nero de scapamenti fin a farte sbossegàr-fora i polmoni, tra ‘na fiorida litania de rachete, no’ l’è che ‘stó Bernardi te vegna voia propio de benedirlo… anca se prima che ghe se impissasse su la suca la lampadina del genio, se g’avea da far, col vento, la neve o el sol a martèl, chilometri e chilometri sul caval de san Francesco.
Ma, brontolamenti a parte, Enrico Bernardi, nato in contrada s.Paolo de Quinsàn (‘na frassión ‘péna fóra Verona dela quàl l’à pura lassà ‘na pressiosa documentassión dei primi ani del noveçento, traverso ‘na serie de foto sperimentali) l’è stado, nela storia de l’automobile, un personagio de primo piàn, inventando e brevetando, el 22 agosto 1882, el primo motór funsionante a bensina: primo, rispeto a Carl Benz (breveto del 25 otobre 1882) e a Gottlieb Daimler (breveto del 16 dicembre 1883).
El novo propulsór, prodoto in serie nela fonderia Rocchetti e nele oficine de Padova dela “Soc. Veneta Imprese e costrussioni pubbliche & C”, l’è sta’ denominà “Motrice Pia” dal nome dela prima fiola de Bernardi che par prima la l’avea proà sula só machina da cusìr. El motorìn, de minime dimensioni, consumi ridoti e in più a bon marcà, el g’à ‘vudo diversi impieghi e l’è stà’ esportado anca a l’estero, specialmente dopo che a la grande Esposissión de Torìn del 1884, s’à podù amiràr la prima machina da cusìr motorisada del mondo, premià co’ la medaia d’argento; el massimo riconossimento ne la sessión motori.
Nel 1884 po’, Bernardi, el g’à tacà la motrice “Pia” a un triciclo de legno, mandando in strada el primo “motoscuter” (bis-bisnono del “Moschito”) dela storia; ‘na trabàcola che, ricostruì dai soci del “Veteran Car Club E.Bernardi” su disegno de l’ing. Lauro Bernardi e dotà de l’originàl motór “Pia” tolto in presto dala sede de l’A.C.l. de Verona, el faséa i 7/8 km. a l’ora… e digo poco!! “Scadenà” par le strade de Quinsàn, nel 1884/85, l’avea batù nel tempo le prove su strada de Daimler e de Benz (1886).
Dopo d’èssar deventado ”Profe” de machine termiche, idrauliche e agricole, a l’Università de Padova, Bernardi l’à costruì nel 1889 un motór studiado, propio par l’auto e batesado “Lauro”, ‘sta olta in onór del “mas-ceto” de casa. ‘Sto motór l’à mosso a bensina la prima moto nel 1893 e la prima automobile nel 1894. A dir la verità, “l’automobile” in questión l’èra più che altro un stranbo trapèl a tre rude. Bademo ben, però, che el “nostro” no’ l’à miga inventà propio-propio l’automobile come ancó la conossemo, ‘sta qua, fiola de tanti “pari”; lu l’à inventà i propulsori assionà dal novo carburante (la bensina) che po’, man a man i vegnèa aplicà a machine diverse par le quale l’inventava, però, anca i vari tochi che ocoréa a rèndarle “operative”.
E rivemo, infine, al 1894; n’alba che vede a la luce, con tanto de motór “Lauro” la prima vera auto italiana… prima de ‘na lónga serie fata de picoli e grandi, autentici gioièi!
Ma Enrico Bernardi no’l s’à miga dedicà solamente al motor a bensina! Da quel genio creativo che l’èra, tra le altre, specie nei só ultimi ani, el s’à interessà anca a la fotografia (‘n invensión del 19° secolo), soratuto nel campo dela chimica e del’otica relativa al colór nel processo “Lumière cromo-positivo”.
Nel 1984, in ocasión del çentenario del primo veicolo a bensina, Verona l’à ricordà el só grande fiól con varie manifestassioni, precedude dala rassegna storica curà dal Centro “Il diaframma-Canon”, dal 28 de marso a l’8 aprìl, a la Fotogaleria “La rinascente” in piassa del Domo a Milàn.
Da noialtri, inveçe, g’à ‘vù un gran sucesso de publico e de stampa la Mostra Antologica a la Gran Guardia, in Brà, vèrta dal 24 magio al 7 de giugno, dove è stado esposto i disegni dele machine de Bernardi, le foto in bianco e nero che documentava le só invensioni, le foto a colori da lu scatà e svilupà tra el 1911 e ‘l 1916 e anca qualcheduna dele machine orginali o ricostruì, tolte in presto da colessioni publiche e private e soratuto dal Museo de l’automobile “C.Biscaretti de Ruffia” de Torìn: el modèl original dela vetureta Bernardi del 1894, quela del 1886 dela Dita “Miari & Giusti” de Padova, sempre su breveto de Bernardi, el triciclo-zugàtolo costruì 100 ani prima par el fiol Lauro, l’original motrice Pia del 1882, el motór “Lauro” del 1889 sperimentà nel 1893, la motocicleta Simoncelli del 1902 assionà dal motór Bernardi 120 cc.
Nel 1899/1901, al posto dela “Miari & Giusti” vièn la “Soc. italiana Bernardi” a prodúr le automobiline a tre e quatro rude co’ la carosseria normal o speciale. Ma anca ‘sta Società la sparisse, messa il liquidassión nel 1901.
Dal 1904 e fin a la fine Bernardi el s’à dedicà, in prevalensa, ai studi nel canpo fotografico elegendo come modela stabile la neodeta Ancilla, fiola dela Pia, nata in quel’ano.
Po’ nel 1915 l’à lassà l’insegnamento par la pensión, trasferendosse da Padova a Torin, dove, el 21 febràr del 1919, in ‘na clinica, assistì dala moiér Amalia, a le 10 e 15 minuti, l’è andà nel mondo dei più.

Breveti de Enrico Bernardi

A quindesani, el presenta un modèl de locomotiva con inovassion par far andàr avanti e indrio la machina, insieme a un modèl de machina a vapor fissa, a “l’Espossissión veronese de agricoltura”.
Nel 1864 l‘inventa e el costruisse un “reometro universale” presentà co’ la relativa relassión a l’Istituto Veneto de S.L. e A.
Nel 1882 el breveta a Padova la “motrice Pia”.
Nel 1889 el realiza e brevetta el motór a alto regime “Lauro”.
Nel 1894 el presenta uficialmente a Padova la prima auto italiana… a “tre rude”.
Nel stesso ano el breveta anca un novo strumento par impissàr.
Nel 1895 el breveta el carèl-motór e la trasmissión pneumatica.
Nel 1896 el breveta un novo motór a scopio de gas par darghe moimento a ‘n veicolo.
Nel 1897 el breveta el colegamento cinematico par el sterso.
Nel 1898 el breveta el carèl-motor par veicoli a trasmissión pneumatica e el breveta anca el sistema par ‘verghe la circolassión de aqua freda intorno ai cilindri e el carèl-motór da tacarghe anca ai motori messi sui veicoli.
Nel 1899 el breveta un altro motór a scopio de gas par dar el moimento ai veicoli.

Wanda Girardi Castellani