L’Angolo de la Wanda – Novembre 2011 – “Senografia moderna in ’Rena”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Senografia moderna in ’Rena

 

L’è ’na vita che no’ vago in ’Rena. I me genitori i èra adiritura fanàtici de la lirica e i à scomi­nçià a portarme a védar le opere quando che mi gavéa ’pena tri ani. Naturalmente se ghe andava a pedibus e mi, picenìna, fasevo tuta la strada su le spale de me papà. Me mama la portava i cussini e i gèneri de conforto che i consisteva in: panini col salame o con la bóndola… la bòssa de l’aqua de “Vissì” e l’inmancabile sacheto de rigolissia. Go sempre avù ’na bona memoria e adesso che go ’na carga de ani e spesso passo le note in bianco, vèrso el calto de i ricordi e me fasso compagnìa da par mi! Par dìrvela in poesia (e vago a scomodar Trilussa): “Ma a lei poco i è ’mporta d’esser sorda perché può rimanere ore e ore sensa er disturbo de nissun rumore a ricordà le cose che ricorda.”

Qualche note fà ò speso un par de ore par glorificar Franco Zeffirelli. Mi go ’na gran amirassion par ’sto personagio: l’è, a me opinion, el più grande de i registi e de i senògrafi del cine come del teatro. L’Arena de Verona che la vanta el palcossènico più grande del mondo, la se presta a la creassion de spetàcoli memorabili, specialmente quando l’Ente Lirico el ghe dà aria al portafoli, afidàndoghe el laoro a veri artisti come, apunto, el nostro Zeffirelli.
Sere fà, davanti a un pùblico da grandi ocasioni, è andà in sèna la Boheme de Puccini. I scalini i èra de bojo e a brustolarse le ciape i sarà stà qualche mejar. Mi, però, me riferisso a quei de i posti “popolari” da la parte de l’ala andó che ’l sol, specialmente dopodisnar, el bate a tuto brasso come el ferar su l’ancùsene.

Almanco s’avéssimo lustrà i oci con de le bele sène e le rece con de le voçi degne del nostro splendido anfiteatro! Ma no… la sèna l’èra costituida da un muro bianco a tuto palco e un paimento idem. ’Na carega qua e n’altra là. ’Na spece de tapeto ’ndove i protagonisti i ’ndava avanti e in­drìo. La Mimì (gaia fioraia) l’è vegnuda sù da ’na bòtola… forse par dar l’idea che i artisti i stava de casa in te ’n granar. Quanto a le voçi… ci se contenta gode! In conpenso, specialmente nel Na­buco, ghemo avù ’n’abondansa de panse e de c…
De comparse ghe n’èra anca massa a far, più che altro, confusion. Postà al muro che se no’ fus­se stà par el bianco (bianco da cavar i oci) l’avarìa podù somejarghe al muro de Berlino, ghèra de le biciclete che a un dato momento le s’à moltiplicà, trasformando cusì la sèna in ’na tapa del giro d’Italia. Ne la sèna finale i cantanti i è vègnù fora, strapegando de i stramassi e la pora Mimì l’à dovù morìr su un pajon sensa gnanca l’onor de un leto. Mancava pure la foreta… bona che qualche­dun ga mes­so soto la testa un stramassin piegà. M’è tornà in mente quando el nostro Bepi Lugo ai so tempi, vedendo la pora Mimì co’ la testa de pingolon, seitando a cantar l’à destacà da un mobile de sèna un tacapani e el ghe l’à messo soto el cussin.

L’òpera l’è finì a le óndese e mèsa e n’è restà l’impression che i n’avesse bidonà qualche roman­sa. D’altronde, ne l’ultimo DVD de l’Otello interpretà dal spagnolo Placido Domingo i à scancelà dal testo l’Ave Maria che de ’sta òpera l’è sens’altro el piato forte.
De la stessa tragedia verdiana trasmessa dal teatro de Vienna con el me amigo, l’argentin Josè Cura; òpera precedùda da ’na bela intervista al bravo tenor argentin, citadin onorario de Cerro Veronese, dal nostro Paolo Limiti, la sèna la se presenta con un arco (o portal) sora ’na montagna de maròcoli e l’è cusì fin a la fine.
L’altro spegasso la ’Rena la ne l’à dado con una de le ultime edissioni de la Traviata. In meso al palco ghèra ’na bànbola, granda come el monumento de la Bra e ’l saloto l’èra sul model de quei che ai so tenpi l’à eliminà la Merlin. Naturalmente, el vestito de la Violetta l’èra in caràtere co’ l’ambiente. Finida l’òpera saludà da ’na scàrica de fis-ci, in Bra s’à formà capanèi de spetatori incassà de bruto.

A métarseghe a catar fora e a descrìvar tute le bojade che i n’à rifilà da quando, co la scusa de la modernità i n’à incolà de le fete de parsuto su i oci e su le rece, ghe sarìa da inpenir un nùmaro intiero de Quatro Ciàcoe! La Traviata de st’ano, maraveja de le maraveje, l’à cantà la so parte co’ le braghe ansiché co’ le còtole!
Ghe ne cito qualchedun’altra: l’ultima “edission areniana” del Barbiere de Siviglia: el palco l’èra pien de ’na gabia dove la soprano in costume da circo equestre la se esibiva in esercissi vari. L’ultima volta la s’à pure sentì mal. Durante el spetàcolo el baritono, par conto suo, el coréa sù e zo par la platèa pedalando su un triciclo (la fantasia umana no la ga limiti…).
L’è pur vera che in ’Rena anca in altri tenpi ghe n’è sucesse de bele: un caval l’è cascà nel golfo mistico, sderenando un par de orchestrali! Ne la prima Aida del dopoguera, Radames, (l’era el tenor Galliano Masini…) quando ne la sèna trionfale l’è vegnù in fòra, su ’na portantina con quatro schiavi mori a le stanghe, uno dei quatro l’è scapussà e l’à molà la stanga. Quei altri tri, perdendo l’equilibrio i à fato altretanto, cusì el tenor l’è andà col c.. par tera, tirando co’ un potente “dò di petto” ’na “racheta” da far tremar l’ala de l’Arena, che pur l’avéa tegnù bòta ai teramoti del primo Milenio.

I letori de Q.C; i se ricordarà d’altronde la “passegiada da un cao a l’altro del palco, a passo a la romana, del gato nero, noto afessionado abitante de l’anfiteatro (vedi l’articolo “Da la ’Rena scapa anca i gati”).
Ghè da notar che se i spetàcoli i s’à bastardà, par via de costumi e de senari, anca el colpo d’ocio del pùblico de la platèa l’è canbià la so parte. Le lussuose toilette le ga lassà el posto a jeans taco­nadi, savate, camise desbotonà e pié descalsi…
È sparì la bela usansa de le candeline che se inpissava a mejara ’pena, al sóno de l’ultimo colpo de gong, moréa tute le luci.
St’ano s’à visto propio de tuto: costrussioni sul model de i cubi coloradi che ne portava santa Lussia, enormi soase andó vegnéa projetà le sène. Un colpo de vento el ghe n’à rebaltà una sepeléndoghe soto un cantante, tra el divertimento generale.
Beh, i me boni amissi i vien a descrìvarme quel che no’ posso più andar a védar de persona e la me sempre viva fantasìa la fa el resto.

Wanda Girardi Castellani