L’Angolo de la Wanda – Novembre bis 1996 – “EX INTERNATI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“EX INTERNATI”

L’è stà 30 ani sto setenbre che l’è stà inaugurà el monumento de I’architeto Mirko Vucetich, realisà soto la diression de la federassion veronese de I’ANEI (Ass. Naz. Ex Internati) a Balconi de Pescantina.
‘Sto significativo manufato, costituì da un grande reticolato con tante mane brincà par de sora, el ricorda le çentenara de mejara de internadi nei lager nazisti (i infernali “KZ”), militari e civili, ebrei e non, e po’, via-via, nel 1946 anca provenienti da i canpi de prigionia russi, de i quai gran pochi, e assè mal ridoti, i è ritornadi in Patria.
L’è stà proprio Pescantina a ricevar, subito dopo Bolzan, ‘pena finì la guera, 51 ani fa, i reduci in transito ne la so stasionsina, dàndoghe i primi aiuti e tuto el conforto che i so generosi abitanti i à podudo dar.
Dominica 22 dunque, a le òndese dopo la messa, s’à formà el longo corteo de intervegnùdi da tuta Italia, co’ le bandiere de le varie sessioni dell’ANEl. Rivadi al monumento, la cerimonia l’è sta’ vèrta dal sindaco de Pescantina, Sig. Francesco Testa, a l’intervento del qual è seguì quel del Presidente Provinciale de l’Avis, Generale Rossini, fiol de ‘na vìtima del lager, e quel, particolarmente tocante, del Presidente Nassional dell’ANEI, Prof. Paride Piasenti, uno dei òmeni più amirevoli de Verona.
Presenti, tra i altri, l’Assessor dr. Manlio Fichera, l’Assessor a la cultura de Pescantina, dott. Bruna Vaona e mons. Luigi Fraccari, el Sacerdote ormai otantasetene, ma sempre ativo, che I’à speso la vita par darghe un nome a mejàra de nostri caduti, sepolti “ignoti” in tera de Russia, in Germania e ovunque è passà quela; bruta bestia che l’è la guera. Don Fraccari l’è anca riussì a darghe un nome (Leonardo Dalla Sega) al soldà tedesco che s’à fato fusilar a Ala de Trento, par èssarse rifiutà de sbararghe a don Domenico Mercante, el prete martire de Giazza.
Arente al monumento, gh’è un picolo museo fotografico quantomai interessante, dove, a fine cerimonia, è sfilà tuti i presenti a ritirar gratuitamente ‘na splendida publicassion è dita dal comune de Pescantina e da l’Ass. Nassional ex internati.
Drento al volumeto, g’ò trovà, tra I’altro, le bele poesie de ç;inque nostri poeti dialetali: Bepi Perusi, el Presidente del SIL, dr. Andrea Cason, Italia Bortoloso Fracasso e i conpianti Giuseppe Caprara da Ala e Danilo Tonini da Schio.

Wanda Girardi Castellani