L’Angolo de la Wanda – Novembre bis 1997 – “LETURE PAR L’INFANSIA – Fumeti de altri tenpi”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“LETURE PAR L’INFANSIA – Fumeti de altri tenpi”

Anno XXX n° 14 -3 aprìl 1938 XVI -centesimi 40 el nùmaro.
Par el me 7° compleano (cusì me confesso l’età) gavea dimandà a me papà, par regal, oltre a ‘na scatoleta de carne (la roba che me piasea de più), un abonamento al “CORIERE DEI PICOLI”, setimanal, suplemento ilustrado del “Coriere de la sera” e el me desiderio l’èra stà esaudido anca se solo par 6 mesi; semestral: Regno £ 10, èstaro £ 17, anual: £ 19, èstaro £ 32.
Gh’è da dir che in casa mia za entrava stabilmente la “Dominica del coriere” oltre a “l’Arena” e tuti i romansi de “Salani”; ‘na casa ando’ che se lesea… e lo digo con legìtimo orgolio!
E ècolo qua, el primo giornaleto tuto mio, rivà par posta, ingialì dal tenpo, la carta deventà lustra e lissia come la seda!
La prima pagina la porta le aventure de “Cicalone e Cocciadura”, le didascalìe rigorosamente in otonari, i fumeti a l’essensial.
A castigarli gh’èra senpre “Formichino ingegno astuto” con, a darghe man forte, l’amigo ragno.
A l’interno, l’inmancabile poesia de Turno che, almanco quel, el la scrivea in endecasilabi,
Le rosarie de De Vitalis Berti, quele de Sperandeo, de Greco ecc… Po’ el sor Pampurio che o: “a dar s’afreta i oto giorni a la serveta”, opur l’è “arcicontento del so novo apartamento”. E gh’èra stabile “Mio-Mao”, “Paolone, el contrabandier”. “Ponzipò”, ” Arcibaldo e Petronilla”, “Bibì e Bibò col capitan Cocoricò” e l’antipatico (e senpre a la fine busarà) Moscardino, “Capuceto d’oro”, “Martin Muma… più legero de ‘na piuma”, “Policarpo”, “Maleficus” ecc…, sensa desmentegarse el celebre personagio de Sergio Tofano: EI signor Bonaventura, co’l chilometrico bassotto da la coa par-aria e el final “milion”; ‘na cifra fantasientifica, a quei tenpi, quando che la “Balilla”, machina de i gerarchi, la costava come ancò un par de savate de pèssa.
La radio de casa la ne inmagava con el sogno de “Mile lire al mese”, ma me pare el ghe ne ciapava 500 e la caseta “in periferia” l’èra ridota a du locali a 130 franchi al mese (con el cesso sul ponteseI ando’, quando piovea, se ghe doveva andar co’ l’onbrela e d’inverno col paletò),
A girar, una par una, con delicatessa par no’ far sbreghi, le pagine de quei veci giornaleti, l’è come tufarse in un mondo perso nel giardin de le rosarie più inverosimili. Parfin la publicità la te lassa a boca verta! L’unica roba che no è canbià l’è la racolta de i punti su le scatole de vari prodoti, prima fra tuti ‘na nota, e ancora in auge, conserva de pomodoro che tra i più “prestigiosi premi” la elencava parfin un fero da stiro eletrico, un triciclo e un masenin da cafè con tanto de ruda e vascheta de vero “solido”; desso da antiquariato.
Par ci volea tirarse-sù la petorina, gh’èra el “Fosfoiodarsin” o el “Proton” (me mama la me n’à dà a damejane, ‘binà al pestifero ojo de fegato de merlusso) e, par la belessa, la cipria inpalpabile “Petalia”, col so Pierot drio supiarghe sòra, e la crema “Tokalon” (£ 2,25, la prima e £ 3, la seconda), Par i butini, la pastina gelatinosa “Gaby” e par quei deboli “I’Eutonina”, ricostituente. l papà, po’, i era orgoliosi de “l’armonico svilupo de i so butini”, tirà-sù con el late “Alpe” e la soracitada dita “de i pomidori in scatola e conserve” in quel tenpo l’avea publicisà un novo estrato de carne con el slogan “un quarto de bò in tute le case”.
Ma particolarmente divertenti, se leti ancò, i asterischi de la rubrica “Per voi curiosi” dove se pol lesar: le done guidatrici di automobile le aumenta rapidamente; nel 1937 le italiane con patente i era ben 20.000; atente ai paracari! Opur: l’omo più sior del mondo l’è atualmente un american; 100 milioni de capital! (‘desso con ‘sta cifra no’ te crompi gnanca un apartamentin monolocale).
Naturalmente, oltre al “Coriere dei picoli” gh’èra anca i “albun” de Mandrake, Cino e Franco, l’Omo mascarado, o i “Albo d’oro” de Walt Disney ecc… ma quei i rivava al massimo ‘na olta a l’ano a santa Lussia parché i podea costar anca un par de francheti.
De quel 1937 conservo ancora “Topolino ne la casa de i fantasmi” e “Topolino e el mistero del’omo nuvola”; do publicassioni che me neodi i à cercà de busararme sensa sucesso. G’ò solo parmesso de lesarli in casa mia, sensa “asportarli”.
Ma che difarensa coi fumeti a le porte del 2000; i nostri i era fati par insegnarne el ben, la bontà, el spirito de giustissia e de sacrificio, el corajo, la generosità. ‘Desso, Topolino a parte, testà ‘n’isoleta forsi destinà a far caolea, (par tirarlo-sù i à parfin pensà de farghe idear le storie de qualche divo TV), gh’è solo violensa, stupidità e magari sesso.
Sì, i nostri i era propio altri tenpi: bei tenpi del tenpo che fu!

Wanda Girardi Castellani