L’Angolo de la Wanda – Novembre bis 2005 – “VISITA AL MUSEO CAPRONI de Trento”

…a cura di Graziano M. Cobelli

gcobelli05@gmail.com

Quatro Ciàcoe: da Verona

VISITA AL MUSEO CAPRONI de Trento

Par la fiola de’n vecio pilota che nei ani trenta, proprio sui “Caproni” l’avea“ conossù le vie dei cieli, visitàr el bel museo trentìn l’è far un bagno nela magia de l’infansia, quando “l’Adelina”(l) “riciamà” col papà Aldo a Boscomantico, (po’ a Aviano e a Vilafranca), l’andava col só tenentìn belunese su e zo par tuti i arioplani… qualchedùn propio de quei disnove li, che nel salón del museo i par pronti ancora a decolàr sul fantastico schermo de la machina del tenpo.
Fondado nel 1929 col primato de “primo museo aeronautico e primo museo aziendàl italiàn“ ‘sto bel Museo l’è nato par conservàr le tradissioni de la società fondada dal pioniér e industriàl trentìn Gianni Caproni (1886-1957) e l’à slargà el só interesse a ogni aspeto de la storia del volo.
La sede atuàl l’è stada inaugurada el 3 otobre 1992 ne l’area de l’aeroporto Mattarello de Trento e el presenta n’esposissión de velivoli storici, (incoronà da le celebri ale progetà da Leonardo Da Vinci), su ‘na superfice de 1400 mq..
Interessante inoltre la ricostrussión de n’oficina dei ani “20”, dove se pol védar la lavorassión de le eliche. Ricostruido anca el studio de progetassión de l’ing. Gianni Caproni.
I aerei esposti i riva fin a la seconda guera mondiàl e ghe n’è de splendidi… de superbi e in perfeto stato. Çerto, però, che a vardàr i primi; çerti trabicoli fati de tela e armà de rude da bicicleta, vién fato de dimandarse come che i faseva a star su e, soratuto, come che i faseva i piloti a riportàr a tera la pèle!
El Museo el g’à pura un grosso archivio de libri, fotografie e memorie storiche, spece de un’epoca che, essendose svolta a l’onbra del fassio l’è stà’ fata passàr, con tuto el bon e ‘l manco bon, soto vento, pur co’ la so importante tecnologia e i so ancora più importanti protagonisti (vedi Italo Balbo, El “Moro de Thiene” Agello ecc…).
Da la primavera del 1999 el Museo l’è deventà “Sessión teritoriàl del Museo tridentino de Siense Naturali, co’ la denominassión de: “Museo G. Caproni – aeronautica, siensa e inovassión”.
De la vintina de aerei storici esposti a l’amirassión dei visitadori, nove i è unici al mondo. Tra i più amiradi: un Caproni Ca6 e un Caproni Ca9, fabricà nel 1911, un Caproni Ca100 idro del 1928 e un SM79 del 1934. Inoltre, un LOCKEED F104 STARFIGHTER parmete de individuàr sensa fadiga l’ingresso del Museo.

El Museo el propone visite guidade e laboratori didatici de indirisso sientifico-artistico e storico-aeronautico.

Indirisso : Via Lidorno n°3 -38100 TRENTO TEL. 0461-944888 fax 0461-944900
Orario: da martedì al venerdì 09.00 – 13.00 / 14.00 – 17.00
sabato e domenica 10.00 – 13.00 / 14.00 – 18.00
Chiusura- ogni lunedì e Natale, Capodanno, Ognissanti

Tariffa d’ingresso : euro 2,50 intiera – euro 1,50 ridota – euro 5.00 fameie

Wanda Girardi Castellani

NOTA DI REDAZIONE: Ad oggi orari e prezzi non sono confermati