L’Angolo de la Wanda – Ottobre 1996 – “Adio… Danilo Tonini”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Adio… Danilo Tonini”

Un’altra de le colòne de “la Panocia”, el circolo de poesia dialetal de Schio, la s’à frantumà!
L’èra un poeta vero e un gentilomo de vecio e orami inimitabile stampo, Danilo Tonini, scomparso el 28 de giugno 1996.
Mi l’ò conossù un saco de ani fa, no’ me ricordo gnanca quando; forsi 20 ani fa, quando a Schio ò ciapà la “Navetta d’oro” o a un premio de poesia. Forsi a una dele splendide riunioni anuali del Burchielo dei poeti veneti; riunioni che a ricordarle le me par quasi insognade!
I era tempi nei quai la poesia l’èra ancora l’ospite d’onor, ne le case, nei teatri, nei circoli… amada e riçercada in tute le feste de nosse, de bateso, de aniversari dove el più de le òlte se inprovisava, lì, in quatro e quatr’oto, odi, ditirambi, acrostici e via cantando! (roba che ‘dèsso no’ sà più far nissuno). Tempi, quando de poeti dialetali s’èra in tanti, tuti pieni de entusiasmo, tuti pieni de idee, una più luminosa de l’altra!
Uno a la òlta se va a farse benedir e ‘dèsso, quando vardo i veci elenchi che me serviva ne l’organisassion dei tanti concorsi ‘ndó che ò messo man in sti ultimi 35 ani, me vièn le stornìsie; l’è tuta ‘na scanceladura… tuto ‘na croçe!
Nei ultimi ani solamente; a Verona, Angelin Sartori, Toni Beltrami, la Carla Zanini Ferrari, Gianni Faè, el bravo Libio Da Santa Maria, Arturo Santini, Armando Vezzelli… e via cusì!
Fora da la porta; la Enrica Gorgeri, Gino Tommaselli, Luigi Cibin, Pina Girotto, GianMaria Grandesso, Paolo Cereghini, Giuseppe Baice, Giovanni Meneghini ecc… e ‘desso, gh’è tocà a Danilo.
No’ gh’è stà quasi mai un concorso da le me parte ‘ndo no’l fusse rivà al premio, tra i primi. Le so poesie le g’avéa drento, oltre al senso de l’infinido, ‘na umanità cusita granda da impenir fin a la broca, l’anima e l’ cor de ci le leseva o ghe le sentiva dir.
Scrìvar de’n poeta l’è sempre un fiantin teren minado… ma a parlar de Danilo no’ gh’è pericolo de catar voçi contrarie,tuti i lo aveva apressà, stimà e, soratuto, amà.
Ma cosa gh’è de meio, par fàrghelo conóssar anca a ci no’ g’à ‘vú mai la fortuna de incontrarlo, de lassarlo parlar lu, traverso i so versi ?

Wanda Girardi Castellani