L’Angolo de la Wanda – Ottobre 1997 – “Se n’è andà anca Giuseppe Faccincani”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Se n’è andà anca Giuseppe Faccincani”
Professor, Giornalista, Poeta. Presidente del Cenacolo di Verona. Memoria storica della città.

Tante i è le benemerense, tante le cariche importanti, tanti i riconossimenti che gh’è stà’ dà a ‘stó maravejoso personagio, drento e fóra Verona, specie ne l’anbito del giornalismo che, come pochi, l’à servì, onorandolo. Ma el titolo che più de tuti el sà merità nel só passagio su ‘sta tera, sia ne la vita che nel laòro, l’è sens’altro quel de “galantomo”!
In un’epoca andó che la deontologia de la nostra profession la pararìa morta e sepelì, tanto che, più che ‘l conpito de informar se dirìa che i giornalisti i se assuma tuti, oramai, quel de sporcar, inbroiar e ingarbuiar le cossiense, Bepi Faccincani l’èra la rara avis che se faséa un punto d’onor de ‘doparar la péna pociandola fin infondo nel calamar cristalin de l’onestà. Si… el scrivéa da giornalista sensa però mai desmentegarse de èssar anca un omo onesto e un poeta; poeta de quei che de poesia, prima de tuto, i sà vìvar!
Mi l’ò conossù da butina. So papà e el mio i era coleghi de lavoro a l’Azienda Eletrica de viale Piave. Più che “de vista”, però, lo conossea da le parole de me papà e, traverso lu, ò seguì pure la cariera de Bepi. L’avea scominçià a 16 ani come corispondente e ‘pèna finì la guera l’avéa tacà a scrìvar par “Verona libera” e par el “Coriere del matino” soto la diression de Piero Gonella. A l’Arena el gh’èra entrà nel 1948. El so primo servissio inportante el l’avéa fato su un celebre delito de quel tenpo; quel de la dona tajà a tochi: la Straparava. Quei “tochi” i era, via- via, vegnù a fermarse a le griglie de la Centrale eletrica e me papà, presente al ritrovamento, l’avèa subito ciamà a ocuparsene Bepi, “el fiol del so amigo”. Me ricordo che quela truculenta storia l’avéa messo soto-sóra Verona e Bepi Faccincani co’ ‘na serie de articoli e ‘na so personale inchiesta a la Pery Mason l’avèa scoèrto el mistero. Nel 1949 su me segnalassion el s’avèa dà da far parché fusse messa ‘na lapide su la casa de Emilio Salgari in corso Porta Borsari. Sempre in seguito a ‘na me letera, l’èra po’ riussì a far rimontar in sèla un nostro comune, caro amigo che Verona la stava maltratando ingiustamente da ani; el buratinar Nino Pozzo. Ma Bepi Faccincani l’èra senpre pronto a conbàtar contro le ingiustissie e mai ‘na péna l’è stà, mejo de la sua, ‘doparà con corajo, amor e onestà. I so articoli; fruto de ‘na scrupolosa informassion, i savèa interessar ma spesso anca comòvar… e se sentiva che no se tratava de mestier ma de “sugo de cor e de anima”.
Par ani capocronaca de l’Arena, l’èra el primo a entrar in uficio, la matina, e l’ultimo a andar fora, la sera… quando no’ l’èra note. A lu la çità la ghe deve le grandi inissiative benefiche del giornal, l’apogio al premio de la bontà “Don Bassi”, la “marcia del zugàtolo” e tante altre robe a favor de maladi, ansiani, disabili e poareti.
Bepi, tra le tante importanti cariche, el g’avèa anca quela de Presidente de l’UCSI (union dei giornalisti catolici), oltre a quela nel Sindacato giornalisti, ne l’Ist. Autonomo Previdensa dei giornalisti e nela Federassion de la stampa italiana.
El 15 luglio 1983 l’avéa anca assunto la presidensa del Cenacolo de poesia dialetal veronese; ‘na carica che g’avèa dà lustro al sodalissio e che la l’avèa visto senpre ativo, entusiasta e presente.
‘Sto mese l’èra andà in ferie co’la moier Ivana e vènardi 29 agosto 1997 ò ricevù ‘na so cartolina da Teramo. E a Teramo, proprio quel giorno, a le 17,30, drento a ‘na galeria la morte la lo spetava, pronta co’la messóra. Par le feride causade nel grave incidente a l’inpato co’ ‘na moto, el nostro Bepi el ‘na cusì lassado mentre la so sposa, ferida gravemente, l’è stà ricoverada a l’ospedal.
Nato a Càdidavid l’8 febrar 1923, el g’avèa 74 ani e ancora tante robe bele e inportanti da far, a ‘sto mondo!
‘Dèsso, co’ i parenti, i tanti amiçi e i estimadori, anca i poeti i pianse el colega, l’amigo bon e gentile; el so imparegiabile presidente.

Wanda Girardi Castellani