L’Angolo de la Wanda – Ottobre 1998 –ITINERARI DE FEDE: “LA MADONA DE L’ALTAROL, in Valpantena”
…a cura di Graziano M. Cobelli
gcobelli05@gmail.com
Quatro Ciàcoe: da Verona
ITINERARI DE FEDE: “LA MADONA DE L’ALTAROL, in Valpantena”
“De la storia de l’atual ceseta dedicà a la Madona de l’Altarol, (picolo altar) se sà tuto ma el scominçio de ‘sta devossion el se perde nei “tornichèi” del tenpo.”
La bela ceseta se la pol visitar a 5 km. da la çità, a sinistra su la strada par Boscocesanova, nei paragi del paese de Poian. L’è la meta de tuti i “corajosi” (ultimi avansi de tempi quan che l’omo el vivèa in paçe e armonia co’ la natura) che, sfidando le meiara de auto invià a rampegarse par la Lessinia, i va in çerca dei monti, in braghete curte, setade, e baretin co’ la visiera, macando inveçe sui pedài de ‘na bici; par questo la Madonina afrescà soto l’original arco de ingresso, l’è conossù pura come “la Madona dei ciclisti”.
In origine ‘sto afresco l’adornava un arco tirà-su da la pietà cristiana sul Progno e propriamente de là de’n guado. Po’ l’à fato parte de n’altra ceseta ‘rènte a la qual gh’èra un cimitero e parfin un eremita. La Madonina, restaurada, l’è stà po’ trasferì de là de la strada nela nóva cesa, nel 1883, un ano dopo la più disastrosa tra le piene de l’Adese.
Ma za nel 1600 l’avèa scominçià a regalar grassie “documentà” dai tanti ex voto el più celebre dei quali l’è quel fato inpiturar da ‘n ignoto artista da Gian Giacomo Lonardi, furlan trapiantà a Verona, comerciante de formài, dopo el ritrovamento de la fiola Anzolina che l’èra stada rapì dal conte Provolo Giusti De Le Stele, co’ la colaborassion dei só “bravi” capitanà dal brigante Falasco. ‘Na storia che zà v’ò contà su “Q.C.” nel numaro de l’otobre 1989. Ma par ci no’ g’avésse presente l’articolo, eco in quatro parole de cosa se tratava: La storia, rigorosamente autentica, l’è stà’ descrita da l’abate Caliari in un libro. La data del rapimento: 23 lùjo 1675.
La sèna: ‘na vila a Poian. La Anzolina, bela butèla ma da la salute delicatina, l’èra l’unica, tra i fioi del Lonardi, a ‘vér portà fóra la pèle da la peste, quindi l’èra anca l’unica erede de le grasse sostanse paterne. El conte Provolo; ‘na pèl da tamburo, mane sbuse, senpre sensa un “bèsso”, forsi pensando che’l so nome el ghe podesse far guadagnar la simpatia del formaièr, el l’avèa dimandà in sposa, naturalmente par intaresse, ma el papà el ghe l’avèa rifiutada anca parché za el ghe l’avéa inpromessa al conte Sacramoso. El Giusti, alora, l’avèa pensà ben de far come che se usa in Sicilia: métar, cioè, el Lonardi davanti ale robe fate. Senonché ‘sto qua el s’à rivolto a la Serenissima e i “Diese” par la prima òlta i s’à schierà con el “plebeo” contro un nobile. Dopo ‘n’acanida cacia da parte de le forse venessiane la Anzolina l’è stà’ ritrovà e el conte Giusti el g’à lassà la testa in piassa San Marco mentre Falasco el ghe l’à smenà in piassa Erbe, a Verona. Gh’è da zontarghe che la bela Anzolina par el trauma l’è morta subito dopo e l’è stà sepelì a Verona, in santa Eufemia (la cesa andó è stà’ batesà Emilio Salgari) soto l’altar del Cristo, co’la vesta co’ la qual l’avarìa dovù andar sposa al Sacramoso.
Ma tornando a l’Altarol; Par ‘vérghene le prime ciare notissie bisogna rivar al 1660 quando el Vescovo Pisani el va a visitarla. Ne la peste del 1630 la popolassion de Poiàn da 500 abitanti l’èra calà a 200 e un miracolà con un ex voto de quel’ano el ringrassia la Madona de averlo salvà dal scopio de’n fusìl, dopo èssarse salvà anca da la peste.
El primo restauro l’è del 1712/33. Verso la fine del 1800 inveçe s’à pensà de rifar el tenpieto de sana pianta e l’è stà po’ quando a laori fati s’à trasferì anca l’afresco ch’è stà’ scoperta la data d’esecussion de la Madona; el 1465.
La ceseta atual la data quindi al 1883. Le spese par la fabrica i è amontade a £.8.173,43 con un disavanso, rispeto a le entrate (elemosine, donassioni ecc…) di £.1,95
I ex voto i è a sinistra de l’altar, in ‘na capeleta proteta da ‘na porta a inferiada. Par visitarla, bisognarà rivòlgerse al paroco de la cesa de Poian. La capèla dei ciclisti, inveçe, (su la destra) l’è verta ai visitadori.
Vegnendo da Verona o transitando verso la çità, da la Valpantena, la Madona de l’Altarol; ‘sta picola e pressiosa bonboniera, l’è ‘na sosta de paçe, de fede e de poesia da no’ desmentegarse de far. Ma, anca solo passandoghe viçin, ricordarse de dir n’Ave Maria che la fa senpre bon.
