L’Angolo de la Wanda – Ottobre 1999 – “Cerro Veronese festegia el tenor Josè Cura” – “Dai amiçi de Cerro; primo “ostello”, canpo base verso la gloria”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Cerro Veronese festegia el tenor Josè Cura” – “Dai amiçi de Cerro; primo “ostello”, canpo base verso la gloria”

Questa qua sora, la dèdica che un grupo de amiçi de Cerro Veronese I’à volù incisa su la bela e originai pergamena in argento e oro, opera del nostro amigo, maestro orafo Angelo Antoniazzi, oferta la sera del 16 agosto al tenor Josè Cura, a la vigilia de la so partecipassion al concerto, in ‘Rena, par i 30 ani de cariera de Katia Ricciarelli.
De ‘sto oramai afermado artista, ve dirò che, ‘pena rivà co’ la fameia da l’Argentina, el viveva a Cerro, spetando ‘na bona ocasion par farse strada nel difìcile mondo de la lìrica. Oltre che nel ’91 ghe n’ò parlà anca in febrar 1997, quando finalmente I’avea sfondà e el cantava a la Scala de Milan la “Cavaleria rusticana” direta dal grande Muti, andà in onda sul primo canal de la RAI.
Da alora el tenor Josè Cura l’è passà da un sucesso a l’altro, cantando in tuti i più prestigiosi teatri del mondo e st’ano ghe I’emo avù in ‘Rena; splèndido Radames, ne l’Aida e, ne la serada d’onor de la Ricciarelli, oltre che cantante anca diretor d’orchestra. La sera del 16 de agosto, dunque, nel salon del ristorante “La pergola” de Grezzana, Josè l’è rivà co’ la so bela moier e un par del so “staff’, dopo le prove co’ la Katia. A saludarlo, ‘pena drento, gh’è stà l’esplosivo entusiasmo de i veci amiçi, orgoliosi de aver credù fin da prinçipio ne la so bravura e el tenor I’à riconossù e abrassà tuti, co’ i oci lustri. EI m’à strucà anca mi, un poco preocupada par le me coste, dato i mùscoli a la Rambo che’l g’à! A fine çena, uno de i du promotori, el dott. Domenico Scala (quel’altro l’è el sior Pomari Erbisti) I’à tegnù un bel e comovente discorso, consegnando po’ la targa al festegià.
Soto la massissa pergamena d’argento e oro, su ‘na lastrina pura d’argento, gh’è riportà le firme de i 20 amiçi che avèa aderì a I’inissiativa. Josè el g’avarà cusì anca un tangìbile ricordo del tempo passà nel bel paeseto de la Lessinia; “canpo base verso la gloria”.

Wanda Girardi Castellani