L’Angolo de la Wanda – Ottobre 2000 – “In treno… par la Bra”
…a cura di Graziano M. Cobelli
gcobelli05@gmail.com
Quatro Ciàcoe: da Verona
In treno… par la Bra
I nostri veci i usava dir: “Veronesi… tuti mati”, par via de quel’arieta che; rugolando-zo dal monte Baldo, la ne metea indosso un çerto boresso e la voia de far matessi. I è passà a la storia i schersi organisà al primo de apriI dal giomal “L’Arena” co’ le inconfondìbili “satade” del Profe Gino Beltrarnini, de Angelin Sartori e i altri spiritassi del Cenacolo de via Zambelli! Purtropo ‘desso i me concitadini i è deventà tuti seriosi “dotori”. Rùspeghi come la carta vetrata, la testa piena de problemi, tuti de corsa, serà-sù ognuno ne la so scatola de banda, col telefonin incolà a ‘na recia, i oci fissi ai semafori e la man sul claxo. No’ i g’à più tenpo par çerte robe, gnanca par contar o scoltar ‘na barseleta e quando che i g’à la fortuna de incontrar qualcheduno come l’ing. Luigi Franchi, inamorà de ‘sta nostra bela Verona, valido poeta, in italian come in veronese, e filosofo (ultimamente l’à dà a le stanpe un interessante volume “Già tutto è stato detto, conoscenza e verità”), i lo critica o, pèso ancora, i lo scansa come che’l fusse un passiente evaso da Marsana.
Quel del trenin turistico in òlta par far conossar, in maniera simpatica e sensa sprotonerie, specie a ci vièn da fora, le belesse del nostro çentro storico, l’è stà el sogno che Luigi l’à coado par trent’ani. Finalmente el 10 de giugno de ‘st’ano i veronesi i à visto spuntar, la matina in piassa Dante e al dopodisnar in Bra, el bel trenin lustro-Iustro con tanto de vagon tacà drìo a la locomotiva armà de canpanela. Con 4000 franchi (sconti familia e comitiva; i “buteleti boni de caminar”, presso normal) par un itinerario “storico” che’l dura 20 minuti, poco pì, el trenin l’èra lì, pronto a entrar in servissio con tanto de spiegassion, oltre che in italian, in inglese e in todesco. La bela idea l’è, come emo dito, de Luigi che, oltre a èssar el paron del “vapor”, qua a Verona el d’è anca de’n altro “vapor” che gira par Bardolin.
Naturalmente, i soliti “Catone” i s’à subito scadenà par el “scandalo” de vedar girar par Verona ‘na giostra conpagna.
A la facia de ‘sti “seriosi”, però, el trenin el parte sempre pien, specie de turisti e de buteleti, contenti come ‘na Pasqua. Insoma, a mi no’ me par propio che ghe sia qualcosa de mal in ‘sta inissiativa. Belo el volantin verde che Franchi el te consegna a la partensa, “Trenini veronesi -spasso-ambiente-cultura”. Par ci ghe interessa, gh’è anca le cartoline a colori.
Ma bravo, Luigi… in ‘sto mondo ando che la poesia e la fantasia le para èssar morte e sepelì, sensa gnanca par sora ‘na piereta comunal… ti te n’è fato vedar che qualcosa è restà a farne ritrovar el gusto par le rosàrie; un pìssego de quela polvarina de la fatina de Peter Pan… “campanelin”, come quel che ne anuncia l’arivo del to trenin.
Wanda Girardi Castellani
