L’Angolo de la Wanda – Ottobre 2001 – “Bei, Rosmunda e… l’invension de la pearà”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Bei, Rosmunda e… l’invension de la pearà

Alboìn, re dei Longobardi, no’l g’à da èssar stà farina da far partìcole, propio par gnente! Nel 568, traversando co’ le trupe longobarde el Passo del Predil, el s’à catapultà in quel de Cividale. Un ano dopo, marciando su la Postumia, ècolo rivàr a Verona dove che subito el s’à fato conóssar distrugendo una importante capèla dedicà a San Zén, el nostro Vescovo moro.
Pò, su le rovine de ‘na roca romana, l’à ereto la sua e lì l’è restà a rómparne le suste fin al 574, cioè fin che finalmente qualchedún no’ l’à pensà ben de tórlo da le spese.
A ‘stó punto, come l’à lassà scrito Paolo Diacono, “l’è stà sepelì con gran pianto e lamento dei suditi (ma ghe credo poco) sóto el declivio de ‘na scalea che l’èra vissina al palasso”, come a dir; de la scala che dal palasso portava a la cesa de San Piero in Castèl; ‘na cesa in parte distruta nel 1801 dai francesi e in seguito definitivamente spianà nel 1852 dai austriaci che su le só rovine i à costruì la caserma-fortessa de San Piero che ancora, amà da qualchedùn e odià da altri, la spica a farghe da spaliera al bel teatro Romano che, incoronà da Santa Libera, el se destende fin a l’Adese.
Alboìn, come tuti savemo, l’è stà copà da Elmichi, conplice de só moiér Rosmunda che probabilmente la volèa solo jutàr la rivolta del só popolo che’l re longobardo l’avéa messo in zenòcio.
La tradissión però la vól che la causa l’andasse atribuì a l’odio che gh’èra nato in cor a Rosmunda verso el marì che, tra le altre mile vacade, l’avéa ‘sassinà só pàre Cunimondo, re dei gepidi, e, ricavà da la só crapa ‘na cópa, in ‘na sera de bagordi el l’avea costreta a béarghe drento del vin.
El celebre cógo-poeta Giorgio Gioco del ristorante “Dódese apostoli” a ‘sta truce storia el ghe zonta però ‘na nota alegra atribuendoghe al cógo de corte de Alboìn, só lontàn colega, l’invensión de la pearà; un piato paradisiaco che l’è servì a stimolàr la fame persa da la regina dopo la poco gradì beùda.
El solito storico Paolo Diacono el ne dà po’ indicassioni pitosto precise sul posto dove che i à sepelì Alboino. Qualche decenio fa fidandosse de ‘ste indicassioni parèa che la tomba la fusse finalmente stà’ individuà. S’à parlado de la cantina de ‘na casa colonica che faseva parte del complesso architetònico dito “el palasso de Teodorico” (altra anima bona!) a metà de ‘na stradela nominà “vicolo Cieco borgo Tascherio”. La stampa, a quei tenpi, l’à batù el tanburo a la grande contandone che co’ “l’ocio de Minosse” i era riussì a védar el Re, coerto da ‘n’armaduta e co’la spada de oro, ma po’ tuto s’à stuà e gnanca se ghe n’à parlado più, segno evidente che se tratava de ‘na bùfala; una tra le tante che i giornài da senpre i ne rifila quando no’ i g’à gnente de più inportante da dir.
Ma tornando a la “pòra” Rosmunda; restà vedova, no’ çerto inconsolabile, l’è riparà a la corte de Longino, esarca de Ravenna e lì l’à sposà el conplice Elmichi. Stufa po’ anca de quel, l’à tentà de invelenarlo. Elmichi però, pur se massa tardi, el se n’à inacorto e l’à fato in tenpo a costrénsar la moiér a béar el resto de la scudèla, cusì i è andà tuti dú a magnàr el radécio da la parte de la soca, ne l’ano de grassia (l’è el caso de dirlo) 579.

E adesso, eco la ricèta de la pearà:

La pearà

Par far la pearà ghe vól passiensa;
cuciàr de legno e fógo a sospiràr,
téia de tera a bóca scoerciolada,
mèsa giornada sana de missiàr.

Groste de pan gratado; un mèso chilo.
Oio; dù goti, pévar; ‘na bruscà.
Raspàr da ‘n osso grando la miòla
‘na nosa de butiero e ‘na salà.

Brodo ristreto; quanto la de ciama
e infondo ‘na gratada de formàio
par far che la sia pari a la só fama!

Su arosti, su bisteche, codeghìn
e i lessi la compagna lóngo el viàio
tirando in coa a seciari l’aqua e ‘l vin.

Wanda Girardi Castellani