L’Angolo de la Wanda – Ottobre 2004 – “VIAIO SUL PIANETA ROSSO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“VIAIO SUL PIANETA ROSSO”

In sti ultimi tempi no’ s’à fato che parlàr de Marte, ciamà “el pianeta rosso”, sul quàl è aterà dù trabìcoli spedidi ala ricerca de aqua e, par conseguenza, de forme de vita. In ‘sta corsa l’Europa la g’à dà la pòlvar ai americani e mi me la son godù un mondo! Infati, la sonda europea Mars Express, l’è stà’ in grado par prima de trovàr prove çerte dela presensa de grandi quantità de giasso nele calote polari marsiane. Adesso gh’è da speràr che, insieme co’ l’aqua, no’ salta fora el solito marsiàneto verde, fodrà de sate e de antene!

MARTE, quarto pianeta del sistema solare, el g’à diverse someianse co’ la tera. Par esempio, la durada del giorno e ‘l ciclo de le stajoni e par questo l’è stà sempre ogeto de particolari atensioni e de diverse missioni a la ricerca de la presensa de qualche forma de vita. Marte el g’à dó picole lune: Phobos e Deimos, del diametro rispetivamente de 21 Km. e 12 Km. Guardado a ocio nudo, ‘sto pianeta el se presenta rossastro. Nel momento che più el se aviçina a noialtri, l’è a poco manco de 55 milioni de km. e ‘l deventa, dopo la Luna e Venere, el corpo più brilante del cel. ‘Sti aviçinamenti però i sucede ogni dú ani e i è ciamadi “oposissioni” in quanto i se verifica quando Marte el se trova oposto al sol. Çerte olte le oposissioni i è particolarmente bone, come quela de l’ano passà quando Marte l’à tocà el record de viçinansa co’ la tera dei ultimi 50.000 ani.
La prima visión complessiva de Marte e le prime imagini le n’è stà fornì dale 6 missioni fate tra el 1964 e el 1976 dale sonde americane Mariner. Sempre nel 1976 le sonde Viking 1 e 2 i è aterà fasendo le prime indagini. Nel 1988 anca la Russia l’à lancià dó sonde ma però la gh’è andà sbusa.
L’atmosfera de Marte l’è fata de anidride carbonica (95%) ma gh’è presente anca un 2,7% de azoto, un 0,2% de ossigeno. La temperatura la pol passàr i 15°C sora zero, ma de media l’è sui 33°C soto zèro ma se pol anca rivàr a oltre 100°C soto zèro! Un bel freschèto! Comunque la temperatura no la saria mia el problema più grosso (con un bel majòn de lana se podaria starghe), el problema l’è la pressiòn atmosfèrica! De media l’è un centèsimo de quèla nostra! Vol dir che se noialtri fussimo in giro par Marte sensa tuta spassiale moriressimo stofegà par la mancansa de aria!
Se Marte ancó l’è ‘n anbiente cusì ostile, no’ vol dir che’ l de sia senpre stà’. El pianeta rosso, el rivela diversi segni de’n lontàn passà dove fiumi, laghi e adiritura mari i coerséa la só superficie. L’atmosfera alora la dovéa èssar densa assè, simile a quela dela nostra tera primitiva. Grandi vulcani i scaricava enormi quantità de anidride carbonica e vapor de aqua, mantegnendo un alto efeto serra. L’atmosfera riscaldada e piena de umidità la produséa continui tenporài con fulmini e precipitassioni. Circa 3,5 miliardi de ani fa però, fin che su la tera le prime colonie de alghe asure le popolava i mari creando quei depositi che ancó conossemo come stromatoliti, l’atività vulcanica marsiana l’à scominçià a ralentàr. El picolo pianeta no’l g’avéa ‘bastansa calór interno par sostegnerla.
L’atmosfera cusì l’è andà rarefasendosse, mentre l’aqua la se ritirava par de soto o la scapava via, nel spassio. Marte l’è partanto un pianeta abordido ma pól darse che la vita la se g’abia podù svilupàr o adiritura che l’abia podù mantegnerseghe in çerte nice geologiche, come nel sotosuòl, beneficiando magari de sorgenti idrotermali dove el giasso, presente soto la grosta, el vièn desfà par el calór dovudo a ‘na residua atività vulcanica secondaria. I marsiani i podarìa alora èssar le alghe o i protozoi, picoli esseri unicellulari, assè difarenti da l’imagine dei marsiani dela leteratura. Ma cosa conta? I sarìa comunque esseri viventi nati su un altro pianeta e questo dimostrarìa che dovunque ghe sia una minima possibilità, la vita la tàca e se la pol la se svilupa. E alora, guardando nel cel; quele miriadi de stele distanti, ognuna con el só seguito de pianeti, podemo de sicuro sentirse manco soli!
L’idea che su Marte ghe podesse èssar vita l’è partida diverso tempo fa. Nel 1877 l’astronomo italian Giovanni Schiapparelli l’à anuncià al mondo la scoperta dei canài e l’astronomo american Percival Lowel l’à ipotisà che i fusse artificiai, fati da esseri inteligenti par l’irigassión.
Nel 1996 la NASA l’à dà la notissia de’n meteorite marsiàn catà in Antartide nel quàl s’à trovà trace de organismi simili a batteri.
Ma la ricerca la continua e zà se parla de ‘na missión in programa nel XXl secolo con equipagio a bordo.

VIAJO SU MARTE

Se nei prossimi decenni i astronauti i lassarà la tera par afrontàr el longo viajo fin al pianeta rosso, i dovarà afrontàr, oltre ale dificoltà tecnologiche, anca altre problematiche manco conossude ma non çerto secondarie che le rendarà le permanense nel spassio manco poetiche e interessanti de quanto podemo imaginàr.
Me ricordo che me fiol Flavio (l’astrofilo) pèna che l’à scominçià a parlàr l’à subito espresso el desiderio de far, da grande, l’astronauta; un mestièr pitosto dificile e ris-cioso. L’à cambià pò’ idea quando che l’à savù…

COME CHE SE VIVE NE LE NAVICELE SPASSIALI:

Dal corpo dei astronauti se destaca forfora, rufa, sudór, spuacio ecc… e tutto questo el resta nel’aria del minuscolo ambiente cosicché nel giro di pochi giorni la spussa la riva a bàtar i piassè slordi dei tonbini.
In quanto al resto (pipì e popò); i vièn butà fóra dala naveta intorno a la qual, pò’, in massima parte i sèita a rudàr… poco poetici sateliti.
Gh’è pò’ la dificoltà de adattamento al continuo veloce alternarse del giorno e dela notte; a la particolare e poco apetitosa nutrissión, ala dificoltà del sono, e a le cusidete necessità fisiologiche.
Par rivàr su Marte l’omo el ghe metarà 7 mesi. Ma a ‘sti passi, el ghe la farà?
Se dise che i russi i resista meio in quanto i è bituà ale alte e basse temperature e in quanto a esigenze, rispetto a noialtri i è assè più spartani.
Par far pipì, i uomini i usa un tubo (i americani i ghe n’à uno par’omo… i russi, più pitochi, uno per tuti). Assè più dificoltosa se presenta la façenda tratandose inveçe de donne.
Infine, in assensa de gravità, se verfica giramenti de testa, decalcificassioni dei ossi perdita de efficiensa del sistema imunitario, perdita del tono muscolare e dificoltà nel sono.
Ne la navicela, tra l’altro, no se pol usar pene stilografiche o biro e i americani, senpre pronti a sbaràr grosso, i à stansià 3 milioni de dolari per trovar ‘na solussion a ‘sto problema. I russi, dal canto suo la solussión i l’à catà sensa spèndar un rublo; i usa le matite e bonanote.
Intanto è zà praticamente andà in frégole n’altra vecia “legenda”; l’esistensa dei marsiani! Da ani e anori emo sognado su çentenara de libri e de film sti, inevitabilmente verdi e picoli E.T., ateradi qua e la, lassando segni grandi e fondi coi so UFO… overo “dischi volanti”, de solito ben intensionadi a conquistàr la tera, dopo averne parà via, sensa tanti complimenti a pessatade nel c… Gh’è n’è tanti, e da tuto el mondo, che i giura de aver visto ‘sti cusideti marsiani e gh’è ci li descrive con tanto de antene e quasi sempre simili a dei grossi ragni. Me son spesso dimandà parcosa mai i g’à da èssar sempre cusita nudi, bruti e schifosi e, no’ avéndoghe le mane (ma solo sate) come i ha mai fato a costruìr aparechi spassiali boni di rivàr qua, secoli-seculorum prima che noialtri terestri se sia podù rivàr la!
Ma la fantasia dei omeni no’ la g’à confini e gh’è parfin ci giura de èssar stà “ospiti” dei estraterestri o, peso, rapidi.
Marsiani a parte, ‘na roba l’è çerta… che l’è impossibile che in tuto l’universo, tra miliardi de galassie, stele, pianeti e pianetini no’ghe sia altra vita fór che qua su la tera, ‘sta picia sensa pace, ‘sto “atomo opaco del male” come che l’à definì el Pascoli… e pò’ se cusì fusse pensè quanto spassio inutilmente sprecà solo par farghe corona a la nostra prosopopea!
E pensàr che bastarìa ‘na sassà de’n qualche meteorite un fià più grosso dei soliti par sparpaiarne tuti, con tute le nostre tràpole, telefonini conpresi, ci-sa’ mai ndove !

Wanda Girardi Castellani