L’Angolo de la Wanda – Ottobre bis 2007 – “S’A’ SMORSA’ LA VOÇE DE LUCIANO PAVAROTTI – El mondo de la lirica l’è in luto”

…a cura di Graziano M. Cobelli

gcobelli05@gmail.com

Quatro Ciàcoe: da Verona

S’A’ SMORSA’ LA VOÇE DE LUCIANO PAVAROTTI
El mondo de la lirica l’è in luto

No’ l’ò mai incontrà de persona ma g’ò però avudo con lu un pàr de coloqui telefonici, quando, a nome del Comitato “Giuseppe Lugo” del qual son stada par ani segretaria, l’ò invitado a vegnèr a Verona a ritiràr, sul palco de l’Arena, el premio che anualmente ghe demo ai grandi tenori che à fato conóssar la lirica italiana nel mondo.
L’avevo ciamà con el so numaro privato e el m’à risposto proprio lu. L’è stà gentile, el m’à ringrassià ma purtropo, essendo che l’èra de partenza par l’America el m’à dito de ripètarghe l’invito l’ano dopo, cosa che ò fato… puntualmente. Se vede però che no’ l’èra destìn che la façenda l’andasse in porto; proprio in quei giorni era morto só papà cusì ò solo podudo farghe, a nome del Comitato, le condoglianse.
Apassionada come son del melodrama, inamorà in special modo de la lirica italiana e iscrita a dú dei più inportanti circoli veronesi: el “Verdi” e el “Zenatello”, me son sempre interessà de conseguensa dei só interpreti, in prima fila de Luciano Pavarotti del quàl g’ò dischi, CD, film, publicassioni ecc. A dir la verità non ò però mai visto de bon ocio el “matrimonio” con Zucchero e Lucio Dalla e spero proprio che “Big Luciano el vegnà ricordà prima de tuto par quel grandissimo interprete lirico che l’è stà, parché l’è stada la lirica a farlo conóssar e a farlo amar in tuto el mondo. El sipario el s’à serà su la sèna de Luciano Pavarotti, el 6 de settembre del 2007: El g’aveva 71 ani… essendo nato ne la çità de la “secia” (Modena) nel 1935. Alievo de A. Poli e de E. Campogalliani, l’avea esordì nel 1961 ne la Boheme de Puccini a Reggio Emilia dopo aver vinto el concorso internazionale de canto. Da ‘stó tranpolìn l’è partido pò’ col vento in popa calcando in pochi ani i palcoscenici de tuti i più inportanti teatri del mondo come: el Coven Garden de Londra, el Metropolitan de New Jork ecc… L’à pure incantà el publico de Tokio, de Amburgo, de Berlino, Barcellona, ecc… Tenor de grande popolarità, nel 1965 l’à esordì a la Scala de Milan col quela che l’è restà pò’ e só caval de batalia: la Boheme.
A só ativo el g’à ‘vú çentinara de incisioni, video e publicassioni. In America l’à anca girà un film d‘amor!
A deta de tuti i meio critici “La grande dutilità vocale, la qualità, la belessa e la luminosità del timbro, l’omogeneità ne l’intiera gamma con un svetante e lucente registro acuto” i a fato de Luciano Pavarotti un interprete unico!  La so fama l’è paragonabile a quela de Enrico Caruso  nel  secolo passà. Quanto al só repertorio che in prinçipio l’èra rivolto a le opere romantiche, col tempo el s’à gradualmente arichido de altre più dramatiche, fin a tocàr l’opera mozartiana (Idomeneo) e quela verista (Andrea Chenier de Giordano e I Pagliacci de Leoncavallo).
Nel 1991 l’à interpretà par la prima volta in forma de concerto, l’Otello ala Chicago Simphony Hall soto la diression del maestro Solti.
Nei ultimi ani l’avea ridoto la so presensa nei teatri d’opera preferendo esibirse in recital.
De ‘sti qua è restado celebri quei in compagnia de Placido Domingo e Josè Carreras.
In Arena là cantado nei ani: 1972-73-76-78-80-85-90, e el só “Vitoria… Vitoria!!” sbarado… al de sora dei scalini… e po’ su… al de sora de l’ala… se l’à sentì fin sul Liston!

Wanda Girardi Castellani