L’Angolo de la Wanda – Ottobre 2010 – “El Cristo de Don Camillo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

El Cristo de Don Camillo

Sfojando un giornal de tempo fà, m’è cascà l’ocio su ’a notissia: “Danneggiata da un incendio nella notte di Pasqua la chiesa di Santa Maria Nascente a Brescello, nella Bassa reggiana. Indenne il grande Cristo di legno con il quale, nei film della celebre saga, don Camillo dialogava.”
Subito, come al spalancarse de ’na finestra a ’na folà de vento, me s’à inpissado ne la mente una drio l’altra le imàgini de quei capolaóri che, a distansa de meso secolo, gnancora no’ i à stufà. Mi me li son crompà in DVD e le aventure in bianco e nero de Don Camillo, prete da batalia, de Peppone, sindaco rosso, del Cristo che parlava co’ la voçe del grande Ruggero Ruggeri e de tuti i altri splendidi, umanissimi eroi de i romansi de Guareschi, ’desso me li godo ogni òlta che me va de gòdarmeli!
Ponta da la me mai sassia curiosità ò volù interessarmene più a fondo. Prima de tuto, quando el regista francese Julien Duvivier, l’è stà incaricà de trasportar sul schermo el “Mondo piccolo” del scritor Giovanni Guareschi l’à dovudo trovar un paese che el corispondesse a la so idea.
“Voilà le pays ideal!” l’a esclamà dopo aver visità Brescello, un paesoto su la sponda del Po. Su quel senario cusì, da quel momento s’à mosso i personagi : Don Camillo, Peppone, la vecia maestra monarchica e tuti i altri atori “conprimari” o senplicemente comparse che i à cooperà a le riprese.

El Cristo parlante l’è stà fato dal veronese Bruno Avesani, (classe 1921) scultor e senografo, sul model de quel de la cesa de Busseto (la cità de Giuseppe Verdi), un Cristo del XV secolo da l’aria soferente e trascurà da i brodi. El problema l’era che in una scena Don Camillo el doveva portarlo in procession (co’ la sola compagnia de ’n can) traverso el paese, fin su la riva del Po… e un crocefisso de legno alto du metri l’avarìa pesà un sproposito. Sto problema l’è sta risolto dal me concitadin; ’n artista che l’à firmà pure altre grandi opere come “Zorba, il greco”, “La Bibbia” (vinçitor de tre Oscar), ecc. Avesani, dunque, l’a realizà sia la croce che el Cristo, (alto 1 metro e sessantaçinque sensa la croçe) in balsa; un legno legerissimo, tanto che l’intero crocefisso el pesava solo 13 Kg. El regista l’aveva richiesto anca de le teste intercanbiabili con espressioni diverse… e la cosa l’è sta usà un po’ nel primo film. Dopo però s’à deciso che l’era più serio lassarghe al Cristo senpre la stessa espression.
Finidi i film el Cristo parlante l’è stà provisoriamente messo in magazin, ma la gente ormai la ghe se s’era afessionà e la lo voleva in cesa par poderlo pregar e adorar. El Cristo l’è stà regalado dal produtor Angelo Rizzoli a la cesa parochial de Brescello e conservà con cura da l’alora paroco don Dino Alberici. Dopo ’na giusta consacrassion, l’è stà sistemà in ’na capela tuta sua, fianchegià da colone “tortili” e da un baldachin, apena dentro in cesa, su la sinistra. Col tempo la devossion popolare l’à fato aparir al so fianco anca de i ex voto! Andando a guardarlo a Brescello, ’sto Cristo magro, tribulà, e insanguinà no te vien çerto da pensar che el sia sta un ator del cinema!
A Brescello ghè, tra le altre, un bel museo dedicà a la realisassiòn de i film de Don Camillo. Se pol anca conprar foto, cartoline e libri. Con 10 euro te porti a casa un volume sior de 70 bele fotografie in pulitissimo bianco e nero a ilustrar le storie de Guareschi.
La saga l’è composta da 5 film e ga messo man tre registi tra i più inportanti: Julien Duvivier l’à direto “Don Camillo” e “El ritorno de don Camillo”; Carmine Gallone, “Don Camillo e l’onorevole Peppone” e “Don Camillo monsignore ma non troppo”, mentre Luigi Comencini l’à direto “El conpagno don Camillo”.
I du atori principali, inparegiabili… “grandi”, i è stà: Fernandel ne la parte de don Camillo e Gino Cervi in quela de Peppone. Divertente, originalissima l’idea de far dialogar el prete col Cristo de l’altar magior; dialoghi quanto mai spassosi!
De Brescello se pol dir che la saga de don Camillo la ga dado al paese un’inportansa che la sèita a créssar col tenpo. El stadio e la cesa parochial da alora i è come che ’l l’à volude el grande regista francese, par esigensa de copion. Davanti al portal è restà el protiro in travertin fato costruir da Angelo Rizzoli, cusìta come è restà la grande canpana in vetroresina che l’è cascà sul sindaco Peppone, fortunatamente privà del batocio. ’Ste qua i è ancora dó tra le mèjo mète che i turisti i seguita a inmortalar con i so obietivi. Par circa 18 ani, ne la speransa de intivar el sucesso de i primi, altri produtori, registi e atori i à tirà in bal don Camillo e ’l so entourage, ma nissuno à savù imitar la vis comica de Fernandel e de Gino Cervi…
Don Camillo e Peppone… par tuti, i è lori!!

Wanda Girardi Castellani