L’Angolo de la Wanda – Ottobre 2011 – “La siora Meneghini”

…a cura di Graziano M. Cobelli

gcobelli05@gmail.com

Quatro Ciàcoe: da Verona

La siora Meneghini

Giovanni Zenatello, el grande tenor veronese che ’l ga ’vù la felice idea de usar l’Arena de Verona come teatro lirico per métar in sèna le più bèle opere, l’èra andà nel 1947 in ’Merica a cacia de novi talenti e li l’à conossù par caso un soprano de nassionalità greca con ’na voçe interessante: Maria Callas. A so parer l’èra adata a interpretar la Gioconda de Ponchielli, una de le opere che lu el gaveva intension de métar in sèna. Maria, dunque, l’è rivà a Verona el 27 giugno 1947, invità da Zenatello, con apena 24 ani de età e tanto corajo. Par intanto l’à tolto alogio in ’na modesta pension del centro: “L’Accademia”, che ancó la esiste ancora e l’è deventà uno tra i più bei hotel del centro.
Entrà presto nel giro de i amanti de la lirica, Maria a la sera l’andava a çena con lori al ristorante Pedavena, in piassa Bra. Tra i habituè, ghèra anca un industrial vero­nese: Giovan Battista Meneghini… abondantemente su i “anta” e grande apas­sionà de opere liriche, che ’l s’à subito inamorà de la nova cantante greca, anca se l’èra grasso­tela e, a parte la voce, nel conplesso pitosto insignificante. Deciso a conquistarla a tuti i costi, l’à scominçià dunque a farghe la corte, sensa dar peso ai amiçi che i lo toléa in giro parvìa de la scarsa avenensa de Maria.
Giovan Batista nel mentre che el ghe faséa el fil a la cantante el s’à oferto de farghe da agente e l’è stà cusì in bona parte el deus ex machina del debuto de Maria in Arena ne la Gioconda de Ponchielli, soto la diression del maestro Tullio Serafin. El sucesso l’è stà strepitoso e da quel momento s’à verto, soto l’ala protetiva del so Batista, come ’n arcobalen la favolosa cariera de la Callas.

Meneghini el la circondava de amor! L’èra pitosto maùro, rispeto a ela, ma tanta l’èra la passion par la soprano greca che, dài e dài el 21 april del 1949 l’è riussì a portàrsela a l’altar e più precisamente ne la sacrestìa de la cesa de i Filippini. El matrimonio no’ l’è stà celebrà in cesa parché la Maria l’èra de religion greco-ortodossa e no’ l’avéa volù convertirse al catolicesimo. Quela sera stessa par viajo de nosse la s’à inbarcà par l’Argentina, scriturà dal teatro Colon de Buenos Aires.

Tornà da la ’Merica l’è andà ad abitar con so marì a Verona, in via Leoncino. In ’sta via, proprio de fronte a la casa che nel 1875 l’à visto nàssar Renato Simoni, una bela targa la ne informa che lì Maria Callas la ga ’vù residensa dal 1950 al 1955.
A Verona, dunque, la ghè stada un bel toco!
Meneghini par dedicarse ànima e corpo a la so sposa, l’à lassà la diression de le so aziende in mane sicure e el s’à trasformà in agente a tempo pien. Maria, deventà la siora Meneghini, quando l’èra lìbera da inpegni de laoro in giro par el mondo la andava a sponsar ne la vila de so marì a Zevio, ne la canpagna veronese, o in quela de Sirmion, sul lago de Garda. I ani trascorsi a Verona, in spece quei sul Garda in conpagnìa de l’inamoradìssimo marì e de Toy, el so barbonçin nero come ’na tàcola, i è stadi par ela i più sereni. Tra i du sposi, malgrado la difarensa de età, par propio che ghe sia stà l’amor più sincero e profondo. Le opere liriche la i è provava nel parco de la vila de Zevio, compagnàndose al pianoforte nel mentre la gente del paese, con scale, tole e barili postadi al muro che circonda la vila, la se muciava a scoltarla incantada. Sia a Zevio che a Sirmion la riceveva i amiçi, specialmente i coleghi del palcossènico, ai quai la ghe serviva i tipici piati veronesi che la s’à dado da far a imparar par far contento el so “Titta”. Tante i è stade le fotografie scatà in quei tenpi… tra l’altro, dopo èssarse sotoposta a na misteriosa cura dimagrante, Maria l’avéa perso 30 chili, deventando più bela e elegante: n’autentica diva.
In quei ani l’à cantado con tuti i coleghi più inportanti: Franco Corelli, Nicola Rossi Lemeni, Mario del Monaco, Gino Bechi, Giulietta Simionato, Ebe Stignani Tito Gobbi, Renata Tebaldi, ecc. El matrimonio con el “Titta” el paréa perfeto ma nel 1959 la siora Meneghini l’à conossù un so conpatriota: l’armador Aristotele Onassis, un celebre “Casanova” e la s’à ciapà ’na inspiegabile cota. Durante ’na crocera sul lussuoso panfilo “Christina” che con i coniugi Meneghini l’avéa inbarcà le più alte autorità de la tera (Churcill, Agnelli, ecc.) Maria e Onassis i è deventadi notoriamente amanti. Podemo ben inmaginar la desperassion del poro Giovan Battista! La passion de Maria par l’armador greco l’à scancelà tuto el resto… la cariera, el marì, Verona e Sirmion dove pure l’èra stà felice.
La gente del lago i se la ricorda fin da quando nel 1952 con el so “Titta”, soridente e cordiale con tuti la se fermava a tor l’aperitivo al cafè Grand’Italia.
’Bandonà el marì par quel’amor falso la s’à catà a la fin sola e co’ le man ude. Onassis, come savemo, el l’à ’bandonà par sposar la vedova de Kennedy: Jaqueline.
El 15 marso 1975 Onassis l’à lassà ’sto mondo e da quel momento Maria l’è vissuda da reclusa a Parigi.
El 16 de setembre 1977 la grande cantante l’è stà trovada morta… no’ s’à mai savù come e parché.
Propio quel’istà del 1977, dal Savoy Hotel London, a un tal “T”, (sicuramente “Titta”, el diminutivo del nome del marì con el qual la Callas e i amiçi i èra abituà a ciamar Meneghini), la grande cantante la gaveva mandà le frasi che vegnéa dopo la parola “suicidio”: la romansa de l’ultimo ato de la Gioconda de Ponchielli, l’opera del so esordio a l’Arena de Verona:

“In questi fieri momenti tu sol mi resti
e il cor mi tenti
l’ultima voce del mio destino
ultima croce del mio cammino…”

Le ceneri de la Siora Meneghini i è stade sparse nel mar Egeo, tra la costa elenica e l’isola de Egina e nel vento che sgonfava le onde, sparpajando quel che restava de la sfortunada Maria… paréa de sentir la so voçe bela e limpida come quela de ’n àngelo.

Wanda Girardi Castellani