L’Angolo de la Wanda – Ottobre 2015 – “I eroi de Avesa”

…a cura di Graziano M. Cobelli

gcobelli05@gmail.com

Quatro Ciàcoe: da Verona

I eroi de Avesa

Avesa adesso l’è un quartier de Verona. Fin a pochi ani fà però el faséa comune, e anca se dal centro l’è distante solo un par de chilometri el ga sempre ‘vù la so storia e le so tradissioni… come quela de le “lavandare” che fin a l’inissio del ’900 le lavava ne l’aqua linpida (e freda) del fiumesel del paese i nissòi de bona parte de la çità. Ma no l’è de le “lavandare de Avesa” che vòi parlarve, ma de una de quele storie de eroismo, sconossude a i più, che solo el passar del tenpo el pol far sì che le vègna a gala.
25 April 1945: setant’ani fà. Prime ore del dopo-disnar… don Giuseppe Graziani, ex pàroco del paese e atualmente capelan militar, el vien a saver par vie traverse ‘na notissia spaventosa: i tede­schi i ga intension de far saltar la polvariera! Dovì saver che durante la guera i nazisti i avéa inpenì la vecia cava de tufo vissin al paese con uno de i più grandi depositi de munissioni de tuto el nord Italia. El par­ché l’è facile da capir: la Valpolesela l’è a l’inissio de la Val d’Adese, cioè de la strada maestra par el colegamento, via Brennero, co’ la Germania. Par i tedeschi l’è da sen­pre la “porta de casa” e i s’avéa atressà par difèndarla!

Don Graziani no el perde tenpo… al monta su la so fedele bici e el se fionda al comando tedesco, a Verona. El comandante a l’inissio el tergiversa ma po’ el conferma: sì, se sta sbaracando… e a l’alba vegnarà fata saltar la polvariera par evitar che le 40.000 casse de tritolo che ghè dentro le finissa ne le man de i Aleati. Ma la gente? La gente la ga el tenpo de scapar! (“adesso che te me l’è dito, forsi sì, fiol d’un can!!!” l’avarà pensà a denti streti el prete)… ma la çità? A du chilometri ghè Verona: quei lì no i ga mia el tenpo de scapar! 40.000 casse de esplosivo: mejara de morti, forsi diesine de mejara! El tedesco l’è duro come un tedesco. Ma el prete el sa èssar anca più duro: a forsi de dài e dài el riesse a otegner qualcosa, cioè el per­messo de udar la polvariera, ma a l’alba la vegnarà fata saltar con quel che ghè dentro, tritolo e gente.
Don Graziani el se precìpita a Avesa, el passa un àtimo in cesa a recuperar tre campanèi, de quei che se doparava a l’elevassion, e insieme al pàroco don Zerbini e al curato don Dellalio (che curiosamente tuti e tre i se ciama Giuseppe), scampa­ne­lando come mati i ciama a racolta el paese. Ormai scominçia a èssar sera. Se forma un capanel in piassa: i tede­schi a le prime ore de l’alba i fa saltar la polvariera. Podemo scapar subito el più distante possìbile o çercar de disine­scarla: cosa femo? E qua vegnemo a quel’eroismo che ve diséa a l’inissio… tanti veronesi no i à mai savù che quela l’avarìa podù èssar par lori l’ultima note su ‘sto mondo: a Avesa çirca mile persone, òmeni, done, buteleti, veci, i forma na cadena umana da dentro la colina fin al bosco, passàndose le casse de tritolo una a una a la debole luce de le lànpade e soto i fusili puntà de i tedeschi. Basta ‘na sdinsa, ‘na disa­tension, e se vola tuti in paradiso. Nel bosco le casse le vien verte e el conte­nuto spanpanà tra l’erba: el tritolo a l’aperto e bagnà no el scopia più. La cadena la continua… vien le una de note, vien le du, riva le tre… le mane ormai le sanguina, i brassi i fa mal ma se continua. Don Graziani l’è quel che dà corajo a tuti… el spo­sta casse de esplosivo, mastegando preghiere. Vien le quatro: i tedeschi ormai i è tesi come corde de violin… se par sbalio a uno ghe scapa ‘na ràfica… Verso le çinque riva l’ordine: “Rauss! rauss! caputt! schnell!” Anca se no l’è ancora l’alba i tedeschi i decide “basta”: i ga pressia! Se deve scapar. Dentro resta ancora mejara de casse de tritolo: se scapa! A le 6,30 (i tedeschi i è sempre precisi) la polvariera la salta par aria. El boato el querse Verona: de bonbe ne i ultimi ani ghe n’era ca­scade tante, ma ‘na roba così no se l’aveva sentida mai! ‘Na piera dopo el volo la finisse su una casa: siè morti. Altri i se zonta parché i era ancora massa vissini. Avesa la vien forte­mente danegià. ‘Na grandinà de sassi la casca su Verona… ma tuto finisse lì: la çità l’è salva!

Nel ’45 però le ferite i èra così tante che s’avéa smesso de contarle. E anca i eroismi. Quel de Avesa l’è stà riscoperto solo nel 1990… no’ che i abitanti i se l’avesse desmentegà: i noni i ghe le contava ancora a i neodini, ma par far conóssar a tuti cos’era sucesso ga volù l’inpegno de du veronesi, Giorgio Peroni e Emma Cerpelloni, che i à catà sù le testimonianse de ci ancora era vivo e i l’à messe insieme in un libro: “La notte dell’Apocalisse”. Tre ani dopo, anca grassie a ‘sta documentassion, l’alora presidente Scalfaro l’à consegnà a la çità de Verona la medaja d’oro al valor militare… e l’eroismo de la gente de Avesa l’è stà a i primi posti tra le motivassioni. Don Graziani l’è vissù ‘bastansa par védar che quei lontani eventi no i era stà desmentegà: nel 1991 nel corso de ‘na comovente cerimonia ne la piassa de Avesa, con intorno ci come lu “ghera”, l’è stà finalmente decorà con ‘na medaja d’oro. Adesso ne i giardini del paese ghè la so statua… sul piedestal invesse del sènplice nome ghè scolpì tuta la storia, in modo che ci passa de lì el possa conóssar come l’è stà che nel 1945 mile persone in una note da incubo i à salvà Verona.

Wanda Girardi Castellani
Mirco Castellani

da: La notte dell’Apocalisse (lo scoppio della polveriera di Avesa – 26 Aprile 1945), a cura di E. Cerpelloni e G. Peroni, Edizioni Stimmgraf, 1995.