L’Angolo de la Wanda – Ottobre bis 1996 – “LETARE IN REDASSION”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“LETARE IN REDASSION”

Caro diretor ,
pa’l gusto de i apassionadi de lirica, vorìa segnalar sta circostansa. La sera del 10 agosto 1996, prima de I’inissio de la Carmen, sul palco de I’Arena de Verona, davanti a quasi vintimila spetatori, s’à svolto la cerimonia de consegna del premio Lugo che ne le precedenti edissioni I’èra stà assegnà a Placido Domingo e Josè Carreras.
La letura de i scopi del Comitato, nato nel 1994 su inissiativa del Maestro Luciano Pollini e del comm. Giuseppe Pezzini, e la motivassion del premio, l’è stà fata, come le altre volte, da la sotoscrita, coadiuvà da ‘na tradutrice in lingua inglese: “AI Maestro FRANCO CORELLI che durante la so longa e sfolgorante carriera dal 1955 al 1975 I’à interpretà a l’Arena de Verona 15 ruoli in altretante opere liriche: Carmen, Aida, Tosca, Tourandot, Norma, el Trovatore, la Fanciulla del West e l’Ernani“.

EI rinpianto musicologo dr. Carlo Bologna, sentendolo la prima volta I’à esclamà: “Finalmente ‘na voçe da Arena!” e el maestro Gianandrea Gavazzeni de ‘sto grande tenor italian I’à scrito tra l’altro: “EI so squilo eroico, la potensa – propio quel che se definisse come el metal vocale – e la prestansa sènica, i s’à inposto ben presto, al de qua e al de là de l’ Atlantico, fasendo de Franco Corelli uno tra i massimi protagonisti de tri deceni de vita operistica”.
A ‘sto punto, da i altoparlanti de l’anfiteatro s’à librà ne l’aria la voçe de Corelli in ‘na registrassion de l’Aida e par quel so “Se quel guerier io fossi…” è po’ esploso un aplauso fragoroso, condì da meiara de richieste de “bis!!”.

Franco Corelli, solo davanti a quela marèa de pùblico entusiasta, ricordandose ben i so trascorsi trionfi, l’è restà a brassi verti, comosso. Po’, dopo aver ricordà Giuseppe Lugo, el g’à ringrassià tuti, dopodeche el sovrintendente de l’Ente Lirico, dr. De Bosio el g’à consegnà la bela targa; incision, a man, in argento de l’orafo Angelo Antoniazzi su disegno de Luciano Pollini.
Finì la cerimonia, Corelli e la so Signora, tuto el Comitato e i amiçi estimatori del festegià, i s’à trasferì a “Villa Vento” dove, durante ‘na çena elengantissima i Comuni de Sona e Sommacampagna, la Pro-Loco de Custoza e el Comitato i g’à oferto al tenor, fiori e ancora altri riconossimenti.

Grazie d’averme lassà dir. E saludi cari.

Wanda Girardi Castellani

Ghe xe ben poco da zontarghe… a sti foghi d’artificio! Solo el ramarico de no èssarghe stà, oltre ai conplimenti pa’l qualificante inpegno a la nostra amica Wanda, e par le bele inissiative al Comitato.