L’Angolo de la Wanda – Ottobre bis 2001 – “Premio “G. Lugo” a Alida Ferrarini”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Premio “G. Lugo” a Alida Ferrarini

Del celebre, splendido soprano Alida Ferrarini, amiga e conteranea, me són zà ocupada su “Q.C.” nel numaro 5 de magio 1991 partanto, emula de Paganini, no’ me ripetarò rifaséndo de ‘sta brava cantante, al conpleto, l’ormai lóngo curiculum.
Par ci no’ avesse leto, comunque, el soracità articolo; brevemente:
Alida Ferrarini, nata a Villafranca veronese, incoragià dala stima, tra i altri, de Tito Schipa e de Toti Dal Monte, l’à scominçià la cariera, dopo diversi importanti premi in vari concorsi lirici, nassionai e esteri, debutando nel 1974 al Donizetti de Bergamo, in Boheme.
Pò’ la strepitosa cariera la l’à portà a cantàr, a fianco dei più noti cantanti; Domingo, Carreras, Corelli, Pavarotti, Kraus ecc… in tuti i più importanti teatri del mondo: al Coven Garden, al Metropolitan, a Parigi, a san Francisco, a Buenos Aires, a Monaco, Tokio, Vienna ecc… oltre, naturalmente a quei in Patria.
El só repertorio l’è siór de ben 30 opere e l’è stà direta dai più grandi diretori: Molinari Pradelli, De Fabritiis, Abbado e via discorendo.
La çità de Voghera la g’à intitolà el circolo “Amici dela lirica”.
In finis, Alida Ferrarini la conta ‘na vasta discografia e video con emitenti RAI e straniere.
Quando la sera de l’8 agosto, durante l’anuàl concerto lirico in onor de Giuseppe Lugo, a Villa Vento de Custoza, presentà dala regista, atrice, Luciana Ravazzin, l’à ricevù el premio speciale ala cariera (opera de l’orafo Angelo Antoniazzi su disegno del Maestro Luciano Pollini), el lóngo aplauso del folto, elegante publico intervegnù, l’à fato cascàr, come se fusse stà de autuno, le foie dei platani secolari che ghe fà coèrto al bel teatro a l’aperto del ristorante che l’è stà residensa de l’indimenticado tenór veronese, titolare del Premio costituido nel 1994.
A far corona a l’ospite d’onór s’à esibì in varie magistrali interpretassioni, el mesosoprano Sarah M’Punga e el baritono Alberto Gazale. La serata l’à podù anca contàr su’l simpatico debuto de ‘n tenor: Filippo Micale, elievo dela brava mesosoprano “sanzenata” Adriana Lazzarini, Madrina del Comitato.
Alida, durante la serada, la g’à regalà al só publico entusiasta tre dei só cavai de batalia: “Tu che di gel sei cinta”, dala Turandot de Puccini (che la g’à dedicà a Luciano Pollini, ancora ‘na òlta deus ex machina de tuto), “La canson de Vilja”, dala Vedova alegra de Lehar e la romansa dela Wally, de Catalani, “Ebben ne andrò lontana…”; roba da far resussitàr i morti!
De ‘sta gloria de casa nostra ghè ancora da dir che, oltre che la voce, la g’à anca anima e sèna! Fisicamente pò’, la avalóra el déto veneto: “la galina minudella la pàr senpre polastrella”!
Un aplauso speciale ala “profe” Michela Forgione che, come sempre, l’à compagnà da pàr suo i cantanti al piano.

Wanda Girardi Castellani