L’Angolo de la Wanda – Ottobre ter 1996 – “Vecio fonografo a tronba”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Vecio fonografo a tronba”

“Vecio fonografo a tromba che nel 1900 l’era l’orgoglio de casa, alto come un monumento… ”Da ‘na canson del Quarteto Cetra…

Na dominica de qualche tempo fa, ò pensà ben de restar a Verona e, dopo aver beù el cafè sul liston de la Brà, son andà a la Gran Guardia a gòdarme la mostra de i veci telefoni e fonografi: una tra le più bele e interessanti de i ultimi tenpi.
L’organisassion l’è stà del Comune, Assessorato a la Cultura, pro ADMO (Ass. donatori midollo osseo) e la mostra l’era alestì ne la splendida Sala Vini.
A la destra de l’ingresso, ben comodadi co’ le so brave didascalie, i modèi de i telefoni da l’800 al nostro secolo, fin ai ani “’60”, provenienti da tuto el mondo.
In centro, fonografi a tronba e a valiseta, a rulo o a disco, tuti quanti co’ la so manovela e “picù” da chilo coredà de ‘na fila de scatolete de pontine de tute le marche e tipi.
Tacà ai muri, dischi d’epoca con in centro el celebre can sentà co’ el muso vissin a la tronba; “La voce del padrone”… e ci no’ se lo ricorda? ‘Sto marchio l’è nato nel 1899 da l’intuission de’n pitor inglese; Francis James Barraud e da l’intuito comercial del fondador de la Victor Company. Barraud l’avea visto el so can, fermo davanti a la tronba del fonografo in funsion, a scoltar inmagado, incisa sul cilindro la voçe del so paron.
Ma, tornando a la mostra, de là del banco central davanti a un poche de file de careghe parecià par ci volea sponsar e, soratuto, scoltar, un adeto el manovrava uno tra i mèjo fonografi de la colession da la qual monumental tronba vegnea fora remote e fonde come da ‘n ‘antica cripta, le voçi de Caruso, de Tamagno, de la Patti, de Lugo, de Zenatello, de Gigli, Tagliavini ecc…, i autografi dei quai i era pura picà-via su i so ritrati, ai muri tuto de intorno.
Sentà anca mi, scoltando a oci serè me son lassà trasportar distante, in un mondo tanto più chieto e più s-cèto, quando me sio Gino el me fasea scoltar i stessi dischi sul so fonografo a tronba, costruì e intarsià da me nono Desiderio, noto marangon e intajador de Veroneta.
Me par ancora de vedarlo; dopo aver verto el coèrciolo del “monumento” e montà el “picù” sul brasseto, el selieva da la scatoleta de fero ‘na pontina, tastàndola a pian col deo par sincerarse che no’ la fusse spontà, po’ el le montava rimetendo el brasseto sul so suporto, quasi con religion. El sfilava el disco, pesante che mai, da la busta de carta, el Io netava co’ ‘na pessa morbia e po’ el Io infilava nel caùcio in çentro del piato. A’ sto punto: silensio e fermi tuti! Na masenada de manovela e po’ col deo l’alsava el “picù” e lentamente el lo conpagnava sul bordo del disco. Come par magia la voçe de i grandi de la lirica, quei stessi che ò scoltà chela dominica a la Gran Guardia, la se alsava a inpenir tuta la casa, rinbalsando su i muri e passando fora da le finestre e le porte… zo, in strada, ‘ndò che la gente la fasea capanel par gòdarse el concerto anca ela.
Quando po’ el disco el tacava a pèrdar colpi e la voçe la se faseva, via-via, più lenta e più “sgnanfra”, me sio el rimasenava e la voçe la tornava a dar sù, aquistando in veloçità e forsa.
“Halloo!”: questa l’è stà la prima parola registrà da Thomas Alva Edison, l’inventor american, el 18 luio 1877 e el breveto del fonografo (US 200521) l’è del 1878. L’era un afar con un cilindro che girava, coerto da la làmina de stagno su la qual era registrà i soni. El model, propio par questo, l’ è stà ciamà “tin-foil” (fojo de stagno). El g’avea ‘na manovela e do diaframi metalici. Edison par el so primo esperimento pùblico l’à selto ‘na filastroca da butini.
Dopo che lu, Alexander BelI, inventor del telefono (che, secondo tanti l’è stà inveçe inventà dal nostro Meucci), l’à po’ mejorà l’aparechio, dàndoghe al suo el nome de “graphophone” (pronunciator de scritura). ‘ Sto qua inveçe el g’avea el motor a pedài, ‘na capacità de 2 minuti de registrassion, un auricolar par scoltar mèjo i cilindri che i filava a 120 giri al minuto.
I primi aparechi i costava pulito: 100 dolari a l’uno, ma verso i primi ani de, sto secolo za i era caladi a 7 dolari e meso.
Intanto è spuntà el disco. I primi i era de cristal coerti de inchiostro e nerofumo, po’ s’è passadi a quei de zinco co’ la cera. Nel 1887 Berliner za l’avea otegnù el breveto de la ponta de iridio su dischi piati che dal 1893 s’à podù duplicar a piaser.
I dischi i era a’ na sola fassada, tanto è vero che nel 1906 ghe n’à volù ben 23 par registrar un’ Aida (par quelo registrà su tute do se g’avarà da spetar fin al 1904). Nel 1929 sparisse i cilindri e entra in canpo del tuto, el disco.
I aparechi più bei i è stà sicuramente quei del francese Pathe, batesadi in prinçipio “Pathefoni”; i g’avea za la pontina de zafiro e gnente soni nasali. Inoltre i dischi i g’avea el diametro da 25 a 50 cm. In Italia i costava da i 65 franchi in sù, secondo el model. La tronba l’èra de varie dimensioni; qualcheduna splendida, grande e decorada come un gioiel; idem par la “scatola”, parfin intarsià in oro e argento e con i caltini. Ne i ani trenta, eco spuntar la stereofonia e subito dopo l’ultima guera, i dischi Hi-Fi e el Long-Playng a 33 giri in plastica de vinilica. L’industria fonografica italiana l’è nata a Milan nel 1904; “Soc. It. di Fonotipia” fondà da Umberto Visconti di Vimodrone, presidente de la Scala (che, a proposito, la se ciama cusì parché edificà nel 1778 sul logo de la cesa de S. Maria de la Scala fata far nel 1381 da Beatrice de la Scala, mojer de Bernabò Visconti, in ricordo del so casado veronese) e da Tito Ricordi.
‘Desso… el fonografo, de qualunque model, l’è un reperto da museo, Gh’è sistemi novi, senpre più parfeti e sofisticadi; CD e altre diaolarie, che ogni matina, anca lore, le finisse a far tòchi da museo, scalsà da altre ancora ne la corsa a rota de col del progresso.
Ma, a vardar ben, i era tanto più bele, forsi parché manco conplicade come el vivar de ‘na olta, le robe del tenpo che fu!

Eco qua La voce del padrone, del 1899, co tanto de cagneto sentà che scolta.

Wanda Girardi Castellani