L’Angolo de la Wanda – Settembre 1997 – “EL PREMIO G.LUGO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“EL PREMIO G.LUGO”

La sera del 7 agosto 1997, a le disnòve za le scalinade de la ‘Rena i era piene frasà e, par la Carmen, visto anca che ‘l tempo stranamente I’inprometeva de far pulito, se preanunciava un pienon da primato.
De solito el premio “Giuseppe Lugo”, dedicà ai tenori che magiormente i à onorà la lirica, specialmente quela italiana, nel mondo, se lo consegna un quarto d’ora prima del colpo de gong che preanuncia I’opera e, puntuale, a le 20,45, el Comitato, in fila indiana, con mi, in veste da segretaria e presentatrice, a vèrsar el corteo, I’è montà sul palco de I’anfiteatro adornà da la magia dei senàri de Zeffirelli.
A dir la verità, in platea, i soliti “siori” ritardatari i stava ancora entrando a la “romana”, paciolando come tante comare al marcà ma apena che I’altoparlante I’à anuncià la cerimonia i 20.000 pressà su e zo da i scalini in un caleidoscopio de colori e lumineti, i s’à chietadi… tuti fermi e rece a penel.
Mi ò presentà i membri del Comitato, i Comuni de Somacampagna e Custoza, la Cariverona e la Bontex, sponsor del premio e po’ ò leto el curiculum del presselto par el 1997; el grande tenor catanese Giuseppe Di Stefano, tuto tradoto da l’inteprete, sia in inglese che in todesco.
Subito dopo ò ciamà a la ribalta el festegiado e la nostra presidente, soprano Magda Olivero, delegada a consegnar materialmente el premio e i du mostri sacri de la lirica che par tanti ani i avea cantà insieme nei più prestigiosi teatri del mondo i s’à ‘brassà comossi in un diluvio de aplausi.
Finì la letura del curiculum de l’artista, è stà trasmessa la romansa “Celo e mar” da la Gioconda de Ponchielli e sul morir de le ultime note la nostra Magda la g’à consegnà al colega la bela targa d’argento, opera del maestro Angelo Antoniazzi su disegno del maestro Luciano Pollini e gh’è da dir che specialmente i veri intenditori che i è a Vila Vento, po’ quei de le scaÌinade, i s’à consumà la gola sigando “bravo” par ‘ na diesina de minuti.
Sul palco, insieme con el Comitato (el comm. O. Pezzini, el rag. Zatachetto, el maestro Pollini ecc…) gh’era anca l’on. Alfredo Meocci, vicepresidente de l’Ente Lirico e l’assessor al bilancio, dr. Manlio Fichera; el più sensibile, disponibile e sinpatico tra le massime autorità del nostro Comune.
A fine cerimonia, la festa la s’ à spostà a villa Vento dove Giuseppe Di Stefano, sinpatico e a la man… co’l so eterno meso chilo de toscan piantà in boca, el g’à ‘vu al conpleto la sodisfassion che’l se meritava e dove finalmente s’à anca podù sentir “ben” la registrassion de la romansa de la Gioconda che in ‘Rena l’era stà un poco sofegà ne l’inevitabile brusìo e passà, par qualchedun, soto un fià de indifarensa.
In finis, dopo’ na barca de interviste e riprese da par te de la RAI e dele TV locali, Di Stefano, nel saludarne verso el bòto de note, el n’à invità tuti (beninteso… a pochi al colpo) ne la so residensa in Kenia.

Wanda Girardi Castellani