L’Angolo de la Wanda – Settembre 2001 – “E anca Piero Mantovani el n’à lassà”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“E anca Piero Mantovani el n’à lassà”

La triste notissia ghe l’ò avuda de ritorno da ‘na bela gita in conpagnìa de amiçi, na giornada bela dopo tante de pitosto brute; l’amigo Piero, da qualche tenpo gravemente malà, l’à lassà, sto mondo amaro a l’ospedal de Legnago, a le 11.30 de ancò, domìnica 15 luio 2001, la man ne la man de la so Fernanda che, malgrado la precaria salute, no’ la l’à mai lassà, gnanca par n’istante, solo.
Piero l’è stà un sensibilissimo poeta, sia in italian che in dialeto. Apassionado organisador de vari concorsi de poesia, tra i quai el premio “Bruno Tosi” de Legnago e el “Minerva” de Minerbe, l’à dà a le stampe vari volumi: “Luci eterne” (poesie in italian), “Colori del me Veneto” (poesie in dialeto ), “Caleidoscopio poetico” (poesie in italian), “Pagine d’universo” ecc… Comendator par mèriti leterari, Premio de la cultura de la Presidensa del Consiglio dei Ministri, premio dela cultura “Lorenzo Calabrese”, nato a Milan da genitori vèneti, l’à dedicà la vita a la poesìa e in special modo a quela in dialeto, come dimostra i tantissimi premi conseguidi in concorsi poetici non solo trivèneti. Le so lìriche, da le quale trasparisse’ na fede profonda, ne la maestria de l’espression, la dolcessa de l’imàgine, la vigoria de le proiessioni sugestive del verso, le à incontrà senpre l’elogio de la critica in giornài come el Gazetin, la Stampa, l’Arena, Verona fedele, l’Avenir d’Italia, el Corier del Matin, el Giornal de Vicenza, ecc…
Recentemente sul giornal de Verona, l’Arena, è aparso un interessante artìcolo su Piero, rèduce da i massacri de Cefalonia. Su sto argomento avaria voludo scrivar qualcosa anca mi e a ‘sto scopo un ano fa l’avea intervistà.
Oltre a riportar una tra le splèndide poesìe trate da i so libri, voi qua soto trascrivar par i letori de Q.C., tradoto in veronese, el raconto de Piero; me par che el sia questo il modo mèio par ricordarlo.

EI sacrificio de la division Acqui Cefalonia, setenbre 1943 – de Piero Mantovani.

«Fedele a la so fama de onor e de gloria, la division Acqui la s’à silensiosamente inmolà ne le ìsole greche de Cefalonia e Corfù e ‘desso, esenpio par tuti, la veia al de la del mar Ionio, tra le scoliere e le ròce: sinbòlica guardia purificada da I’olocausto del so sangue.
Dopo I’armistissio de I’8 setenbre 1943, la legendaria division abandonà a se stessa oltremar, I’à dovù conbàtar contro preponderanti fòrse nemighe dotà de grandi mèsi d’ofesa che noialtri de la Acqui no’ g’avèvimo a disposission, malgrado le promesse dei comandi italiani e americani.
I tedeschi i n’avèa inposto la consegna incondissionada de le armi par po’ rinpatriarne. Paraltro, da fonti çerte, èrimo vegnudi a conossensa che, ansiché èssar rinpatriadi in Italia, sarissimo stà mandadi diretamente nei canpi de eliminassion. Cusì, con un “Viva l’Italia!”, avemo deciso de seitar a conbàtar, costasse quel che saria costà.
EI nostro entusiasmo patriotico però el n’à portà a ‘na lota ìnpari! L’è stà ‘na corsa bestial al massacro da parte de i tedeschi che i avèa podù contar anca su I’aporto de ‘na divisiòn alpina costituì da ‘na tepalia prussiana pronta e disponibile a qualsiasi nefandessa. Ghe n’avemo ‘vu ‘na tremenda prova durante le 24 ore de carta bianca concesse dal comando cruco a quela masnada; 24 ore de carta bianca che i è stà una tra le pàgine più nere dela storia, tali da oscurar la fama de i lansichenechi al saco de Roma. Quante giovani vite massacrà, mitralià, brusà!
G’ò senpre davanti ai oci i me comilitoni morti, incatastà, soto i olivi, ‘bandonà nudi longo la strada. anca el cimitero italian de Argostoli, capitàl de l’isola de Cefalonia, l’è stà profanà; i à scavà-sù i nostri morti scaraventàndoli a muci tra le ròce de le montagne intorno, par farghe posto, ne le buse restà ude, ai morti tedeschi.
A ‘ste seleratesse se ghe n’à zontà altre; I’afondamento de tri mèsi de trasporto portà de propòsito in mèso ai sbaramenti minadi con el preciso intento de eliminar el so càrico uman.

Questa I’è la me concisa ma profondamente vera testimoniansa, vissuda in prima persona. La sia lessiòn d’amor e de pace la teribile storia de la me division Acqui; inmolada con i so 9000 òmeni, tra sotuficiài e trupa e i so 400 uficiài fusiladi par aver volù tegner fede al giuramento de difèndar la Patria».

 E ‘desso, ciao, vecio amigo… no’ te desmentegaremo mai !

Wanda Girardi Castellani