L’Angolo de la Wanda – Settembre 2002 – “LICIA COLO’DALE FALDE DEL KILIMANGIARO … AL SOL DE SOAVE”

…a cura di Graziano M. Cobelli

gcobelli05@gmail.com

Quatro Ciàcoe: da Verona

LICIA COLO’DALE FALDE DEL KILIMANGIARO … AL SOL DE SOAVE

Ancora ‘na òlta, a Soave, el cortìl d’onór del bel castèl scaligero che incapèla el romantico borgo medioevàl  fodrà de vigneti conossui e apressà in ogni cantón de la tera, domìnica 19 magio, ano domiladó, l’à ospità, par la cerimonia d’investidura dela “Castelania de Suavia”, elegantissimi figuranti in costume medievàl, personagi ilustri e un publico pien de entusiasmo, lì a spetàr da ore, anca se par la magior parte costreto in pié.
Come zà g’ò avudo modo de dìr ai letori de “Quatro ciacoe”, ‘sta onorificensa, l’unica rivolta solo a le done, l’è stà’ inventada nel 1300, da Imperarice de Svevia, moiér de Federico Dela Scala, quando, par premiàr le più fedeli dame dela só corte, l’à tacà a farghe dono dela ciave del castèl.
Diograssia, dominica 19, el tenpo che dala matina el minaciava lensa l’à tegnù, cusì ale çinque dopodisnàr, drio la parada dei sbandieradori, dei tamburini, i arceri, i trombetieri è entrà dal ponte levatoio el cortèo dele Castellane de Suavia e dei Spadarini e subito sul palco è scominçià el spetacolo che oramai da oltre trent’ani se srodola, tra sóni e bali, intorno a le “neo Castelane de Suavia” e ai “neo-Spadarini”; ‘sti qua eleti a far da “scorta armada” a le “castelane” (anca se, visti i tenpi che core, più che de’n “spadìn” sarìa el caso de fornirli de’n mitra).
A èssar intronisà, ‘stó ano, i è stà’ 5 dame e 4 cavalieri:
Madona Piera Graffer, Madona Franca Scandola, Madona Lorella Gasperini, Madona Carla Rodighiero Tessari e Madona Licia Colò. Spadarini: Cav. John Ptice, presidente dele cità murade d’Europa,  cav. Giulio Tamassia presidente del club Giulietta, cav. Franco Lunelli, Presidente dele famose cantine Ferrari de  Trento e ‘l cav. Claudio Valente. L’assegnassión dela famosa ciave del castèl a Licia Colò, presentatrice, giornalista e scritrice, l’è stà ‘stó ano un gran bel colpo! Nata a Verona, bela, simpatica e inteligente, l’à presentado dal 1982 diverse trasmissioni sule reti Mediaset e RAl, colaborando contenporaneamente con diverse testate giornalistiche. L’è autrice, oltre che condutrice, de importanti documentari televisivi par i quali l’à guadagnà diversi premi. L’à publicà anca vari libri: “La mia arca”, “Il sogno”, e “Sognando el Kilimangiaro”. Amante dela natura la s’à senpre prodigà nela difesa dei diriti dei animali e par la salvaguardia del’anbiente. La pratica diversi sport: sci, equitassión, nuoto, tennis e imersioni subaque. Tra le só più inportanti trasmissioni televisive: par canale 5: Bona dominica, el Festivalbar, L’arca de Noè e Paese che vai. Par Italia uno: Gran Prix e Bin-bun-ban. Par rete 4: Amiçi dei animali e par RAI 3: Geo & Geo, Un pianeta da salvàr, El pianeta dele maravéie e Ale falde del Kilimangiaro, rivà a la tersa edissión e portà in prima serata. Tanti anca i spot publicitari par la prevensión dei incendi, par la guida sicura e contro i conbatimenti dei cani.  Diversi anca i documentari-video sui itinerari italiani. In finis, moltissimi riconossimenti internassionali par l’atività televisiva e par el libro “La mia arca”.
Dopo la cerimonia de investitura dele dame e dei cavalieri, tuto condoto e descrito da mi, nela me oltre ventenàl vesta de araldo, da l’alto dela scalinada d’onor del castèl co’ la spónda de ‘na  fila de tronbetieri in lussuosi costumi, la bela conpagnia la s’à trasferì al ristorante dove è stà servì, ancora ‘na òlta tra zughi, canti e sóni, ‘na spendida çena anca quela rigorosamente medievàl.
Un plauso ala nostra imperiàl castellana Nenè Lovat, deus ex machina de tuta l’organisasión, afiancà da la onipresente e instanable segretaria Annalisa Mancini e da le altre “Madone” dela Castellania de Suavia.

L’Araldo
Wanda Girardi Castellani