L’Angolo de la Wanda – Settembre 2005 – “L’osservatorio del Monte Baldo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

L’osservatorio del Monte Baldo

Inaugurato a Novezzina, nel comune de Ferrara de Monte Baldo, el primo Osservatorio Astronomico de la provincia de Verona.

A le diese de matina del 31 de lujo 2005, a la presensa de le autorità del Comune de Ferrara de Monte Baldo, del Circolo Astrofi!i Veronesi “A. Cagnoli”, Presidente el dot. Coghi, e de I’Assessor regionale, dr. Flavio Tosi, davanti a un foltìssimo pùblico intervegnudo, malgrado n’ora e più de strada masenà soto a ‘n caldo african, s’è svolta in località Novezzina (1200 m.) I’inaugurassion de l’Osservatorio Astronòmico del Monte Baldo, intestado a Angelo Gelodi. L’osservatorio el se trova in ‘na posission quanto mai feliçe, viçin a l’Orto Botanico del Baldo, desteso ai pie de la nostra cèlebre montagna che, grassie e la so frisante arieta, la ga guadagnado ai veronesi la fama de “tuti mati”.
EI cel da ‘ste parte no’ essendo inquinado da le luci, l’è el più adato a I’osservassion astronòmica. La bela costrussion la conprende ‘na saleta par le conferense con un çentinar de careghe e n’altra col sofito scorevole dove ghè za posissionà de i telescopi minori. ‘Na cùpola par el telescopio più grande, dove se poi rivar traverso ‘na bela scala a bogonela. Po’, ‘na càmara coredà de leti a castel, ‘na cusina, el bagno e vari computer grassie ai quai sarà possìbile, traverso internet, colegarse al lavoro de i telescopi anca da casa o da le scole. Ghè da dir che ‘sto osservatorio l’è stà concepido par consentir a tuta la provincia de Verona e soratuto ai studenti, I’osservassion del cel da una de le ormai rare località salve da l’inquinamento luminoso.
La so realisassion che l’è stà possìbile co’ i fondi del Comune de Ferrara de Monte Baldo, de la Region Vèneto, de la Fondassion Cassa de Risparmio de Verona, de la BIM-Adige, del Circolo Astrofili de Verona e grassie a I’apassionado interessamento de I’Assessor Tosi, la se deve po’, soratuto, al costante, longo, tenace inpegno de me fiol FLAVIO CASTELLANI, notìssimo astrofilo; uno de i più ativi e validi motori del cìrcolo astrofili veronese e scopridor riconossudo, tra le altre, de ben 16 asteroidi, che con el ragiungimento de ‘sto traguardo I’à visto realisado un sogno a longo caressà. A la fine de la cerimonia tuti i presenti i è stadi invità a un rinfresco e po’a un pranseto “self-service”, el tuto oferto dal Comune de Ferrara come el bel depliant distribuido al pùblico durante I’inaugurassion.

Wanda Girardi Castellani