L’Angolo de la Wanda – Settembre 2006 – “BASTA LA FANTASIA”
…a cura di Graziano M. Cobelli
gcobelli05@gmail.com
Quatro Ciàcoe: da Verona
BASTA LA FANTASIA
Sul bilieto che compagnava un masseto de fiori, ‘na òlta g’ò scrito: “un augurio no ‘l costa gnente ma quando el vien dal cór, el g’à el só valór”; versi pitosto strassi ma sinceri!
Daltronde, no’ l’è indispensabile spèndar un patrimonio par farghe i auguri a n’amiga o a un parente, basta la fantasia!
Mi g’ò tacà al muro, in cusina, un calendario perpetuo andove ò segnà nassite, morte, compleani e aniversari de tute le persone che me sà più care. Ogni mese giro el folio e provedo par ci ghe toca; fiori e regai se són in “pila” e ‘na telefonada o un bilieto se la scarsela la pianse.
Ultimamente, specie se se trata de done, ò scominçià a regalàrghe l’oroscopo completo coredà del significado del nome e del cognome e ve assicuro che l’è stà assè gradido, tanto che gh’è ci l’à messo in cornisa. Bisogna tegnér presente che ‘stó laóro lo devo far distante dai oci de me fiól, che, in quanto ASTRONOMO; ‘na roba no’ de çerto inparentà co’ un “stròlogo”, el me coparìa a capelade.
Quando se trata de regài, bisogna però star atenti de no’ far boiade, specie se no’ se conosse a fondo el destinatario. Sconsilià, par esempio, regalàr cani, gati, tartarughe, canarini o altro “bestiame”, a scanso de pèrdar l’amicissia. Sconsilià anca i capi de vestiario o i soramòbili; robe andó l’è dificile inbrocàr el gusto dei altri. Càpita che (specie tratandose de soramòbili) el regàl el finissa a la pesca de beneficiensa de la parochia có’l ris/cio che, prima o po’, el te torna anca indrio, come che gh’è tocà a me nòra co’ un paiasso de vero de Muràn; infeliçe regàl de nosse sul quàl la s’èra guardà ben de scrivar “ibis redibis”.
Ma vedemo de darghe ai amiçi de Q.C. qualche bón consilio.
1°- provédar, come che ò fato mi, un calendario perpetuo o, in mancansa de questo, un libreto andó podérse segnàr tute le date.
Tratandose de aniversari de morte, l’è un ato de carità e de gentilessa mandar un bilieto, méio ‘na letera, (proibidi, soto pena de ‘na pessatada sui “có-cò”, i famigerati “mesagini” al telfonìn) o far ‘na telefonada; un gesto che fa spiritualmente più siór, ci lo fa, quanto ci lo riceve.
2°- Par un compleano o un aniversario, se se manda un bilieto sconsilio de crompàr quei cartonçini “umoristici” de dubio gusto che se cata nele tabacherie, a meno che no’ se g’abia co’ el destinatario ‘na carga de confidensa.
3°- Se se manda un masso de fiori, el g’à da èssar “manegevole”. Sò par esperiensa quante òstreghe se ghe indirissa a ci te manda çerti “monumenti” che i pol trovàr posto solo nel portaombrele.
Ricordarse po’ che tuti i fiori i g’à el só significato:
L’ACACIA la significa amor platonico. L’ANEMONE; dedissión assoluta. L’ARANCIO, verginità. L’AZALEA, amicissia. L’ALTEA, dolcessa. El BOTON D’ORO, richessa. La BEGONIA, preghiera d’amor. El GLADIOLO, atacamento ai schei, aridità. El BIANCOSPIN, speransa. La BOCA DE LEON, superbia. La CAMELIA, costansa nei sentimenti. La CAMPANULA, speransa de incontràr la persona che riceve stó fior. El CICLAMIN, solitudine. El CRISANTEMO, lagrime. La BELA DE NOTE, alegria che dura poco. La GARDENIA, belessa e candór. LA DALIA BIANCA, sterilità de sentimenti ma la ROSSA, abondansa. El GIRASSOL, adulassión. El FIORDALISO, amicissia sincera. La FUCSIA, teneressa. El GAROFOLO, amor e poesia. El GERANIO, superbia e orgolio. El GIACINTO, gelosia. El GILIO, castità. La ROSA, amor apassionato (se l’è rossa), dolçe e tènaro se l’è bianca, possessivo se l’è giala. La MARGARITA, umiltà (e “brasso curto”… visto che ‘sti fiori te i cati, gratis, dapartuto).
In finis, mai regalàr fiori “esotici” che i simbolegia i schei.
E ‘dèsso, parlemo dei aniversari de matrimonio; ‘na festa sempre più rara, visto che de matrimoni ghe n’è sempre de manco e, quando che i gh’è… i dura da Nadal a San Stefano.
el 1° ano- NOSSE DE COTON (regalàr roba de coton, manco i fassoleti che i porta pégola).
el 2° ano- NOSSE DE CARTA (roba de carta ma sconsilio quela igienica parchè el sarìa un regàl de cativo gusto).
el 3° ano- NOSSE DE CORAME (‘na scuria… par far marciàr drito el coniuge).
A ‘stó punto, no’sò parchè, se passa al…
5° ano- NOSSE DE LEGNO (consilio ‘na bona méscola, par rivàr ben atressadi al FATIDICO…
7° ano- NOSSE DE LANA (cuèrte, papusse e maioni, visto che i “calori” oramai i s’à in bona parte rafredà). Po’… el
10° ano- i è NOSSE DE STAGNO (Dificile catàr roba de stagno, salvo che no’ se vaga a fregarghe la gloriosa mastela dela lissia a nostra nona o el portafiori al nono, in çimitero). E se passa al…
12° ano- NOSSE DE SEDA E DE LIN (un foulard o ‘na camisa da note (o un pigiama) osè par confóndar-via le prime ràpole).
Un altro salto e se va al…
15° ano- NOSSE DE CRISTAL (biceri, portafruti o altro, in sostitussión de quei che se sà tirà drio in ‘sti quindesani). Proibito crompàr el famigerato paiasso de vero de Muràn.
Pò’ rivemo (se ghe rivemo!), al…
20° ano- NOSSE DE PORCELANA (idem come sóra). E eco che riva el..
25° ano- NOSSE D’ARGENTO (tuta roba d’argento o almanco argentà e, par mal che la vaga, se ghe n’avì pochi par le scarsele, a sentìr la publicità in TV gh’è anca, col fondo in argento “puro”, un spassolìn da denti). E rivemo al…
30° ano- NOSSE DE PERLE (consilio de andàr ai bancheti de santa Lussia, par tempo). Po’, eco el…
40° ano- NOSSE DE RUBIN (in mancansa de altro, sostituìr el “rubineto” del seciàr).
50° ano- NOSSE D’ORO (oro e premio Nobel de la resistensa a ci ghe riva).
60° ano, (ma me sà che ghe n’è gran pochi che lo festegia) i’è LE NOSSE DE DIAMANTE- (va ben un qualsiasi cul de goto, tanto a quela età, salvo rarissime avis, se no’ s’è orbi s’è rimbambiti). Pò’…
L’ANO DOPO: l’AUREOLA!!
E quà sèro botega e ve saludo!
Wanda Girardi Castellani
