L’Angolo de la Wanda – Settembre 2008 – “Eleonora Duse la “Divina”!”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Eleonora Duse la “Divina”!

(in veronese da Wanda Girardi Castellani)

Eleonora… ‘Na piera grisa …nuda
desmentegada
apuntamento par le foie morte
de n’onbrela de rame
tra ‘n abrasso de seze
che no conosce scalvo.

Eleonora… N’anfora rusenida
uda come el ricordo!
De tanti fiori ch’i t’à dado in vita
drio l’ultimo sipario
no’ t’è restado un buto
a inprofumar la note.

Eleonora… Nel giardin de sant’Ana
t’à bandonà anca i frati.
Dei battimani s’à desperso l’eco
e mutolì i violini
tra un gracolàr de grole
se sfanta anca i pensieri.

Sóra sucessi e amori
s’à desteso un sudario
ricamà da ‘na pólvar sensa tenpo.
Quàn se va fór de sèna
smorsadi i riflettori
se ‘ngrosta anca el silenzio… Eleonora!

***

Nela romantica citadina de Asolo (Treviso) che nel 1489 la Repubblica venessiana la g’à regalà con sovrana autorità a Caterina Cornaro che la g’à tegnù corte fin a la morte avegnuda nel 1510, ghe semo rivadi in ‘na grisa dominica de ottobre ben intensionadi a farghe visita a la tonba, la casa e el museo de ‘na grande atrice italiana del teatro; Eleonora Duse, considerada, con la francese Sarah Bernhardt, una tra le meio de tuti i tenpi.
Nata a Vigevano el 3 otobre 1858 e morta, dopo ‘na vita remenga pa’l mondo, a Pittsburgh el 21 april 1924, l’è stà’ in seguito portà nela bela citadina veneta che l’amava tanto.
Fiola d’arte, in quanto só papà l’èra un valido atór, l’à scominçià a calcàr le sène da buteleta, fasendo pratica in compagnie de ters’ordine.
El primo sucesso la ghe l’à ‘vudo a Napoli nel 1879 con “I Fourchambault” de Augier e Teresa Raquin de Zola ma la s’à mostrà in tuta la só grandessa ne l’82 a Torin co “la principessa de Bagdad” del fiol de Dumas. Par più de vint’ani l’è stada una de le più aplaudide, amirade, adorade atrici de teatro del mondo. El so repertorio l’èra soratuto fato de le opere de Dumas e de Sardou e dei personagi de sti drami nessuno come ela l’èra stà bon de rèndar el ritrato de le soferense umane. Nessuno come ela g’à ‘vudo l’arte de ricrearghene le emissioni con un realismo inprofumà de poesia .
Nel 1873 Eleonora, za soranominada “la Divina” l’à recità ne la parte de Giulierta ne la me Verona scadenando l’entusiasmo de’n publico che, come ‘desso, no’ l’è mai stà de boca facile.
La celebrità però la l’à otegnù del tuto nel 1878 a Napoli e l’ano dopo el celebre atór Cesare Rossi el l’à voluta come prima atrice e con ‘sta compagnia la Duse l’è deventada famosa in tuto el mondo!
Nel 1881 l’à sposà un colega de la so compagnia; Tebaldo Checchi dal quàl la g’à avù ‘na butina; Enrichetta. ‘Sto matrimonio però l’è durà, come se usa dir: da nadàl a san Stefano.
In seguito gh’è stado ‘na relassion segreta con Arrigo Boito.
Dal 1886, par conto suo, l’à recità po’ in Europa, Egito e Stati Uniti ‘ndo che l’à debutà a New York al Fitth Avenue Theater, ne “La Signora delle camelie” de Alexandre Dumas.
Soto l’influensa de Boito l’à recità i più inportanti tra i drami ibseniani .
Dal 1878 al 1897 la Duse l’àvea rapresentà oltre a Margherite Gautier “Magda in casa paterna” de Hermann Sudermann, Santuzza nella Cavalleria rusticana di Giovanni Verga, Hedda in Hedda Gabler ed Ellida nella “Donna del mare” (1888) di Henrik Ibsen.
Nel 1897 gh’è stà el fatàl incontro con el poeta Gabriele D’Annunzio e la “Divina”, stravolta da ‘na passión che à fato parlàr el mondo, da quel momento la s’à dedicà unicamente a lu … a promovar e a recitàr le so opere: “La Gioconda”(1898), e “Francesca da Rimini”(1902).
Nel 1909, la salute de so mama l’à costretto la Duse a ritirarse da le sène. Qualche ano dopo però , nel 1921, al colmo de la so fama, seriamente malada ma più che altro par motivi de schei l’è ritornà a recitàr; ancora tri ani e ‘l sipario el sarìa calà par sempre!
Nel 1916 l’à senegià e interpretà el so unico film “Cenere” dal romanso de Grazia Deledda par la regia de Febo Mari.

Tuto questo me mulinava par la testa fin che con me marì e me fioi soto n’aqueta fina caminavo in meso a le lapidi del çimitero de sant’Ana de Asolo, sora un tappeto de foie marse. Trovàr la tonba de la Duse l’è stà quantomai difficile. Emo dovuto, co’ le mane e co i piè, çercàr quel nome liberando le piere dal mantèl setembrìn. E finalmente l’emo catà. A sto punto bisognava far de le foto a la scrita ma stava vegnendo sera e no’ so parché… ma de’n rodolo intiero no’de avemo salvà una… Pora Eleonora… mi t’ò bisbiià ’na rechia e po’ tuti quatro, anca el picenin, t’emo batù le mane.
Ne l‘andàr via el me Flavio(4 ani) el t’à molà come che’l fusse un fior… ’na caramela.

Wanda Girardi Castellani

***

Foto da Wikipedia

***