L’Angolo de la Wanda – Settembre 2010 – ““El Pirla” Da la piena de l’Adese del 1882 (per “La Nuova Arena”)”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“El Pirla” Da la piena de l’Adese del 1882 (per “La Nuova Arena”)

Nel setembre del 1882 l’Adese, saltando fóra dal so leto non ancora serà tra le sponde de i muralioni, l’à inondà Verona, spassando via oltre a çerti quartieri che i pociava ne l’aqua (vedi la Binastròa) el za difìcile equilibrio de la strutura produtiva de quei tenpi, basà su le industrie artesane che dipendéa dal fiume par la forsa motrice. Cusì è sparì quasi del tuto i mulini, colegadi a la riva con de le passarele postà su palafite e ancoradi ai àrgini con de le grosse cadene de fero.
’Sti mulini i avéa servì i veronesi par secoli e la testimoniansa la ne vien da Plinio e da ’na pergamena del IX secolo. In riva a l’Adese ghera la fàbrica de capèi “Borsalino” sparì anca quela, come altri inportanti opifici, a brasseto de la redassion e relativa tipografìa de La Nuova Arena. I cronisti de ’sto giornal, no’ podendo farlo végnar fóra, dato che era finìo tuto soto aqua, i s’à dado da far con de le barche a socórar la popolassion.
Avéa sentido dir da me nono materno che ’sti “coleghi” i avéa però catado anca el tempo de tór zo de i apunti su quel che era sucesso in quei giorni terìbili de ’sta inondassion che, secondo el Magistrato de le aque de Venessia, l’era stada causà da de i venti caldi che, seguidi a mesi de piova e de fioca, i gavéa desfà ai monti la paruca bianca, sgonfando el fiume infin a farlo strabordar. Questo… 128 ani fà!
’Na matina del febrar ingiassà de l’ano passà, rumando tra le ratatuje de ’n banco del marcà de le robe vece, a san Zen, m’è vegnù in man un pachetin de fòji ingialidi dal tenpo con sora scrito a lapis: “Avenimenti sucessi durante la piena del 1882”; l’era, pura se inconpleto, el diario de i redatori de La Nuova Arena. Da quel poco che è restado ò podù almanco salvar par i letori de “Quatro Ciàcoe” ’sta storia comovente:

 “A San Zen i lo ciamava tuti ‘el Pirla’ par la so agilità nel far le capriole in meso ai colombi de la piassa. Parenti no ’l ghe n’avéa. L’era nato ci sa ’ndove e la so casa l’era stà senpre la strada. Paraltro, vivendo a l’aria e al sol, el s’avéa fato, a 12 ani, bianco e rosso, ciosso e forte. De solito el stava de le ore ai pié de la berlina de piassa Erbe ma a l’ocasion l’era disponibile par tuti, cusì tuti i ghe voleva ben specialmente le done de i banchi che a turno a la sera le ghe dava da dormir al coerto.
Quele quatro palanche che ghe girava par le scarsele i era guadagnade. ’Na olta sola el gavéa batù cassa a la Gegia, ma l’era stà par dàrghele a ’na pòra vecia malà. Dài e dài, la Gegia l’avéa finì col tórlo come un fiol e lu el ghe ciamava nona. Ne l’82 quando è vegnù la piena ‘el Pirla’ l’era in casa de ela, su le rigaste de San Zen e la note de la domìnica l’aqua l’avéa scominçià a vègnar drento a ondade da le finestrele de la so bicoca. El buteleto e la nona adotiva, spaentadi i pianséa, sigando aiuto. Finalmente un barcon, faséndose largo tra rami, careghe spajà e macerie de mile altre robe sbalotà da le onde rabiose, l’è aparso a un çentinar de metri. – Corajo, nona, fra poco saremo in salvo! – Ma la casa l’à scominçià a tremar e po’, magnà ai fondamenti l’è croada-zo a tòchi. ‘El Pirla’, nel mentre i lo tirava in salvo l’avéa fato in tempo a brincar la Gegia par un brasso, ma un’onda la ghe l’avéa sbregà da le mane, faséndola scomparir tra i neri cavaloni sgonfi de paltan. ‘El Pirla’, ferido, sanguinante e come inebetido, no’ l’à dito ’na parola né l’à fato ’na làgrima. Na olta portà al suto, l’à tacà solo a dimandarghe a tuti quei che l’incontrava: – Etu visto la nona?? – Ne i giorni dopo tanti i l’à çercà. I l’à çercà ne i dormitori, ne le case de le so amighe, in piassa Erbe; nissun l’avéa più visto!
Quel so sguardo fisso, come perso ne l’udo, ghe l’ò senpre ne i oci… e ’desso che ghe penso… ’desso che ò savù la so storia, me nasse drento ’na paura. Un triste pensier me struca el cór e la gola. Pòro buteleto, dove saralo mai?
Nel ciaciarìo de l’Adese, tornà a scórar chieto ne la só cuna, me par de sentìr ancora quela voçe: – Etu visto la nona?… l’etu vista?? (M.B.)”

Wanda Girardi Castellani