L’Angolo de la Wanda – Settembre 2014 – “Létera a l’alpin Bepi Bareta (al CAR)”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Létera a l’alpin Bepi Bareta (al CAR)

Caro Bepi,
visto che in Fiera a Verona émo vendù ben le bestie, anca quela che, come te ’l sè, l’èra a ’n pél dal tirar i sgherleti, mi e to mare, come du siori, co’ le scarpe nóve e i pàni da le feste, ieri sera semo andà al Fisarmònico a védar l’òpara. ”Tosca”.
Trenta sfojóse da mile par andarse a cassar a du metri dal sofito, cusita distanti dal palco che i òmeni i paréa tante formighete in te ’na busa.
To mare l’à tacà subito a sbossegar ’pena che ’l maestro l’è montà su la scragna, tanto che quelo (vestìo da pinguin) el s’à oltà verso noaltri, alsando la bachetina come che a dir: “Mochèla, senò ve la sbato su i denti!” Eh… sì; la ’Dele l’à seità a sbossegar e a scatarar nel fassoleto. Almanco che se fusse tratà de la Traviata; sbòssega éla… sbòssega ’st’altra, la façenda la sarìa passà soto vento, ma chela là, inveçe de morir tìsica, no’ la se va a butar-zo dal castel, sigando come ’n’anguana: “Adìo, mondo crudel!” (ma no’ sò se ò capìo giusto.)

El tenor, apena verte le tende, el s’à messo a impiturar un quadro grando come la piassa Brà; el menava el penel avanti e indrìo, sempre in chel posto e l’à continuà par tuto l’ato. M’à parso che ’l sigasse che: “Urge l’opera!” ma, de chel passo lì, mi me sa tanto che ’l lo finirà quando che sul figar nassarà l’ua!
A un dato momento è vegnù fora la Tosca; ’na dona pitosto ciòssa, piena de cotolamenti, tanto che par un pél, scapussàndoghe drento, no’ l’à fato caoléa.
Lì, i à tacà a begar e a paciolar ma no’ s’à capìo che òspia i disesse.
Ogni tanto, però, lu el discoréa de un “ocio nero”… Se vede che drio el macion i s’avéa dà qualche cassoto.
Po’ è vegnù sul palco preti e ceregheti e ’n omo alto e belo, vestìo da bechin, che l’à disturbà la messa, giràndoghe le spale a l’altar e ospiando verso de noaltri (forsi parché la ’Dele la scatarava a maneta). M’à parso che ’l se ciamasse Scarpa (ma va che nome!).

Ato secondo:
Quel Scarpa che là, go ’vudo l’impression che ’l volesse menarse sul pajon la Tosca, ma quela… nisba! A éla ghe piaséa el pitor Checavaiossi (altro nome da c…) paraltro, un scagarela co’ la panseta, miga come che l’èra el nostro Bepi Lugo: tòco de fusto de róaro! Almanco Scarpa l’èra anca lu un bel tòco de sacramento e in più el bevéa vin come noaltri; gente de casa, insoma! Ma za, le done le ga i so gusti. E sì che ’sta viliaca l’à anca confessà de ’vérghe “vissi d’amore”… insoma, a ’sto punto la podéa anca molàrghela: uno più… uno manco! Inveçe, te avessi visto, Bepi mio, che scortelà ne le brisole che la ga dà, quando quelo l’à tentà de rifilarghe un ciucion… La ghè andà pèso del zio Toni quando che l’à proà co’ la mojer del sagrestan, cucàndose un morsegon sul naso e ’na zenocià ne i cojómbari. Beh… anca lì è finìo lato.

Ato tèrso:
Ghè in sèna un angelo con dó ale che ’l par ’na nave a vela… la spada drita a mirarse un feton e dó gambe curte come quele del nano Bagónghi. Soldà de qua e de là e in cel ’na nuvola nera con dó gobe che la par el camel del circo Togni.
I porta fóra el Checavaiossi in màneghe de mudande e quelo el taca a sigar che “lucean le stelle”. Ma ’ndove… che no’ se ghe ne vede una e fóra piove che Dio la manda!! Po’, parlando de la Tosca : “le bele forme dissioliéa da i veli…”
Sacranon! Par via de le bele forme, mi me sa tanto che ’l gavarìa bisogno de un par de boni ociài. Po’, visto che chela là l’è un quintaleto comodo, par “dissioliarghe” le forme da i veli, el gavarà messo el so tempo.
’Na olta rivà in cao, però, el deve èssar restà pitosto malòto se ’l s’à sentì de “morir desperado”!
Forsi sarìa stà mèjo che l’avesse tegnù smorsà el lume, come che fasso mi quando “dissiolgo” da la camisa to mare!
Ma ’ndemo ’vanti!
Prima che ’l finissa de sbrajar “la vitaaaaaa!” uno el s’à messo a ulular: “bravo!” e ’na diesina de altri i ga fato “ssssss”!
Quel de drio de mi el n’à dito che quel “bravo” che là i l’avéa sigà la “clac” e che a ogni “bravo” i se cuca 100 sfojóse da mile. Subito mi e to mama s’emo messi a far casin, sigando a tuto buso: “Bravooooooo” ma inveçe de le 100 sfojóse s’emo ciapà un cicheto da la signorina in divisa e un bról de “porchi-su-e-zo” da tute le diressioni. Ingiustissia umana!

Finìo el baito, riva la Tosca, sempre co’ i so cotolamenti, e i du i se sbràssola co’ un fià de fadiga par via de le panse che se scontra. Po’, riva i soldà co’ le mudandone bianche, i mete el Checavaiòssi in còsto al muro e i lo fusila sensa tanti preàmboli, nel mentre che la Tosca, da ’na banda, la sèita a cantar e a brontolar par conto suo.
Le fusilade, caro Bepi, i è stade vere! Fiame, s-ciochi e spussa de carburo, tanto che to mama, spaentà, la s’à messo a sbossegar e a stranudar, pèso de prima e ghè scapà anca ’na svèntola; bona che in quel momento sonava i tamburi e quela cusì l’è passà par sotovìa (manco la spussa).
Ma oramai s’èrimo a la fine!
La Tosca, inacorséndose che ’l Checavaiòssi l’èra tuto sbusolà come ’n passapaste, l’è córsa a la mureta e l’è saltà zo… ma el buron no ’l ga da èssar stà ’sto gran fondo e no’ la ga da èssarse fata un gran mal parché noaltri, da la galarìa, a ghe vedévimo la suca vansar sù.
A ’sto punto… tuti i à batù le man e Scarpa, Checavaiòssi e la Tosca, resussitadi, i è vegnù a inchinarse fóra dal tendon, tegnéndose par man, in fila.
Mi e to mare no’ emo capì praticamente un càssigo… ma s’emo godesti da mati!
Te saludo e métete la majeta de lana che là su in montagna ga da far frescheto.

To pare

Wanda Girardi Castellani