L’Angolo de la Wanda – Settembre bis 1997 – “Poesia moderna”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Poesia moderna”

L’altra òlta ò parlà de Piero Sartori e de la Elena Piccoli Falezza. ‘Dèsso voi farve conòssar i altri du “moschetieri” de la poesia moderna veronese. A èssar un tantin imodesta, podaria infilarmeghe drento anca mi, ma i moschetieri i era 4…, quindi, lassemo star la quinta (tanto, me conossi tuti) e po’, visto che son tacada a la metrica come l’edera al muro, propio-propio moderna no’ me definiria, al manco par quel che riguarda la forma.

MICHELE GRAGNATO

“Profe”, giornalista, titolar del “canton de Verona”; pagina cultural de “L’ ARENA ” e altro Vicepresidente del Cenacolo.
L’ò conossù nel 1969, o zo de lì, a Boscocesanova in ocasion de’n premio de poesia. L’avea ciapà el 1° premio co’, na roba, par quei tenpi, rivolossionaria: “quando te me disi…”. Michele l’èra el più giovane de la coà e come poeta l’à lassà tuti un fiantin perplessi; no’ i èra bituadi ancora al metro libaro e a çerti conceti, almanco ne la poesia dialetal! Anca mi, paraltro, in quel’ocasion avea ciapà un premio par ‘na poesìa sgancià da mètrica e rima su un tema altretanto rivolussionario: “Tiro al volo”; ‘na protesta contro quel “sport”, barbaria da medioevo.
Beh… la maniera de far poesia de Michele Gragnato l’è “tuta sua”; el se esprime, in un lessico spesso arcaico, senpre eficacissimo e in genere par enblematismi. Tantissimi, anca par lu, i premi!
Oltre a varie publicassion su la storia e i monumenti de Verona e la so provincia, l’à dà a le stampe un libro de poesie dialetali dal titolo “Caino e la luna” co’ la prefassion de Gian Paolo Marchi. La poesaa che vèrse la publicassion l’è:

“CAINO & C.”

“Caino, el pain (contadino)
che’l sapava la tera
che’l voltava le slope
che’l somenava el gran.
Caino
bruto, slosso
tegnisso come solo i pitochi,
caìn.
E Abele
che’l sonava el pìfaro
che’l parava le pegore
che le faseva “beee”
volendoghe ben
za.
Fra el cel de Dio
e l’infemo dei omeni
gh’è ancora ‘na vosse che siga
da alora

 soto la luna
e par i sgrembrani del mondo
che ne va a manghèl (questua)
Ia rassa”.

GIOVANNI BENAGLIO

Uno tra i più giovani del nostro cenacolo. Funsionario de banca e, nel Cenacolo, solerte, preciso e severo cassier.
Poeta moderno anca lu, con temi atuài. EI ga anca el pregio de la sintesi; ‘na qualità che no’ se incontra spesso.
Tanti i premi. Qualche òlta nei so versi se ghe cata ‘na vena satirica che sgrafa sotovento con inteligensa e, come go za avudo modo de dir, far de la bona satira no’ l’è da tuti; barselete in rima se ghe ne lese tante, qualcheduna parfin de i tenpi de me nono, spaciada par novità, ma versi come el sa farli Giovani, l’è ‘n altro par de màneghe.
EI nostro Benaglio l’è, quindi, un poeta con tante corde al so arco e tute ben acordate. EI scrive anca in italian ma personalmente el me piase de più quando che l’usa el splendido strumento linguistico de casa nostra.
No’ sò da quando el se dèdica a la nostra arte ma da come la sa destregiarse la so Musa sora un fòjo, penso che la poesia el ghe l’abia nel sangue fin da la cuna.
De Giovanni Benaglio:

“LA MONDINA”

Supiaa sul lanternin el solito
rumar straco
e nel silensio parea pì stroo (buio)
che’l stupido star lì
a rimissiar le carte
de ‘n altro tenpo.
L’èra un ricordo garbo,
ingossà,
che strapegaa un canto patìo
e mai finio.
Altro no’ se podea alora,
a testa in zo,
nel borbotar sordo de l’acoa
infumetà de cola,
col lustro can dei paroni
a far as-cia comisa.
Supiaa sul lanternin un fil de aria
apena.
Ma su la periana spetaa istesso
el vecio capèl de paia.
Come fiapa lìgaora,
l’è lì a strangossar ancora
na sginsa de sol.

Wanda Girardi Castellani