L’Angolo de la Wanda – Settembre bis 2001 – I ROBIN HOOD de “La pónta del sol”
…a cura di Graziano M. Cobelli
gcobelli05@gmail.com
Quatro Ciàcoe: da Verona
I ROBIN HOOD de “La pónta del sol”
Uno tra i più bei sport l’è sens’altro quel del tiro co’ l’arco; un sport che ne riporta a la mente intramontabili personagi: Ulisse, Gengis Khan, Nuvola Rossa, Robin Hood; eroi e miti nei quai, nela primavera dela vita, se semo tuti, più o manco, identificà e ispiradi. L’uso de l’arco l’èra conossù fin da tenpi distanti (30.000 ani prima de Cristo) e le prime rapresentassioni de’n arciér i è de 6000 ani fa. Parfin el nostro Cangrande Dela Scala el g’avea el só esercito de arcieri e balestrieri del qual, a quanto dise la storia, l’andava particolarmente fiero.
El nome de la federassión che goèrna ‘stó sport, lo fa conóssar e l’organisa l’è la “FIARC” (Federassion italiana Arcieri tiro de campagna). Nata come associassión venatoria, la s’à in seguito trasformà in federassión sportiva pur mantegnendo nel só interno el setór cacia e pesca.
Dentro la FIARC opera “La pónta del sol”; ‘na colorida e romantica compagnia de tiro co’ l’arco tradissionàl e storico.
I iscriti (done, omeni e parfin buteleti, parché l’è un sport che se pól far a tute le età) i è ‘na çinquantina; tuti col só bravo arco, qualche òlta “compro” ma el più dele òlte costruì in setimane de lavoro ala massima precisión, co’ le só mane. Oviamente, se tira le frece contro sagome de bestie; un tiro che da sodisfassion senza far dano, ne al paesagio, ne ala fauna. E gh’è da dir che ‘sta dissiplina sportiva l’è anca un sgorlón de salute dato che la se svolge a contato co’ la natura. I arcieri; arco in man e frece de drio, nela fantasiosa faretra, i g’à da scarpinàr, rampegando par ore, el più dele olte in meso a le fresche-frasche dove ogni tanto i cata ‘na piassola con i bersagli (in totàl i è anca ‘na çinquantina). Quando che i torna a la base, dove a l’onbria de’n gasebo i cata un gòto e un panetìn, i è sudà come tanti cavai ma anca contenti e sodisfati.
I archi i è svariadi; i va da l’antico Custom da cacia a la Robin Hood, costruì con materiài naturali: legno, corno, osso, tèndine, pèle, fibre vegetali ecc… ,fin al più recente arco longo (long bow) e a quel ricurvo.
L’apassionà, ecletico Presidente l’è un amigo de me fiol Flavio: Paolo Carpigiani, un artista de quei che i pol far qualsiasi roba che tuto ghe rièsse ben! Maestro d’arco e maestro arcaio, l’è lu el Deus ex machina che istruisse le “reclute” insegnandoghe anca le tecniche par costruirse i archi, specie quei storici, spesso de notevole valor parché vièn doparadi, come ò dito, i materiài de alora su modei antichi.
Tra i tanti alievi, el g’à anca du dei fioi de Angelo Antoniazzi, el Lallo e la Grazia, che a só volta i s’à tirà nel masso anca, uno la moiér Luciana e l’altra el moroso Luca.
Le gare le vièn organisade su tuto el teritorio nassionàl.
Personalmente, mi, quando che me càpita de andàr a védar i “tiri”, par sicuressa me ligo un cussìn nel dedrio; ciò, no-se-sa mai!!
La sede de “La pónta del sol”, disponibile sempre par lessioni e prove con Master educativi anca per le scóle, l’è a Negrar de Valpolesela, presso l’Agriturismo Tapparelli, località Fasena 37024 Negrar – Verona, Tel. 045.7500852 (ndr).
Dopo el corso, i alievi “laureà arcieri” i pól andar par i fati sói opur restàr iscriti ala compagnia. ‘Sto sport no’ l’è po’ assè costoso e gnanca l’è stagionàl.
La “ponta del sol” l’à corso par 10/12 ani el “Palio del drapo verde”(Q.C. 1987 n°9); un’antica corsa che Carpigiani l’à rievocà con costumi splendidi vinsendo anca l’ultima edission del 1997. Purtropo, da alora el Comune de Verona no’ l’à più vossù (ci-sa parcosa) ripètar la storica e bela manifestassion che pura la g’aveva ‘vù un strepitoso sucesso de publico.
E ‘dèsso, sicome l’amigo Paolo Carpigiani (che ò conossù in fasse) oltre che pitór, scultór ecc… l’è anca poeta… sèro el discorso con ‘na só poesia oviamente tradota in veronese:
Pesteso l’erba e la tera dei boschi.
Respiro el profumo dei castagnari
naso l’udór del cervo
e sento el reciamo del falco.
El me spirito l’è serén
e me vedo de dentro.
La me man arma l’arco con fermessa
scòco la frecia là,
dove la mente
l’à zà centrà el bersalio.
Wanda Girardi Castellani
