L’Angolo de la Wanda – Settembre bis 2002 – “La piena de l’Adese del 1882 – Cronaca de un disastro”

…a cura di Graziano M. Cobelli

gcobelli05@gmail.com

Quatro Ciàcoe: da Verona

La piena de l’Adese del 1882

Cronaca de un disastro

L’ultima piena del’ Àdese.

Dal giornal “L’ADIGE” –16 setembre 1882

“Fin da ieri matina l’Adese el s’avea alsà e le onde grosse le scorea sòto i oci spaentà de la gente, mèmore de i passadi disastri. A le 9 de la sera l’aqua l’era za rivà a 76 cm. sòra la guardia e l’era penetrà ne le cantine più arente. Fate çerar dal Prefeto Gadda quele de Sotoriva, San Salvador vecio e vìcolo Leoni. La gente de San Zen, Riva San Lorenso, Seghe Sant’Eufemia, la Carega e la Binastròa la taca a portar le robe ai piani alti.”

Senpre da “L ‘ADIGE” – 25 setembre 1882: “‘NA SETIMANA TERIBILE”

“Dopo 9 giorni de silensio forsà, ricominçiemo a laorar.

Sabato 16 setembre, domìnica 17, luni 18, marti 19, mèrcoli 20, i è stà giorni de inferno. Onde giale, sgonfe de spiuma le à martorià Verona! A le tre dopodisnar la nostra tipografia l’è stà devastà e l’è finì sòto aqua. EI 21, San Fermo e via Leonçin i è za un torente e da i Leoni a via Capel no’ se passa più. Da Castelvecio l’aqua l’avea scaricà la so furia su le Regaste, sul corso Cavour, fin a via Quatro Spade, fasendo un tut’un col fiume. Via San Tomaso, Via Sammicheli (Binastrova), el Seminario, Sant’Anastasia, San Stefano, Santa Maria in Organo; tuta Veroneta I’è un torente vorticoso. A le seghe San Tomaso è cascà do case: al n° 8 e al 20. Interote le comunicassioni telefòniche. Durante la note taca a piòvar da novo; aqua da sòto, da sòra… dapartuto!”

LA “ÇITÀ L’È PRESONIERA DEL FIUME”

“A le 9,45 de la matina del 22, l’idròmetro de San Gaetano el segna m. 3,71; el màssimo de piena ne la nostra storia. EI ponte Novo, dopo 582 ani de lote vitoriose, investì da du metri de rigùrgiti, scassà da l’urto de ‘na marèa de detriti: taole, tronchi e uno de i mulini natanti desancorà da la riva, a le 10,55 el frana. La gente che la se incalcava, trategnù a forsa da i soldadi su le do teste de ponte, la scapa urlando verso la via Nova. Par che sia propio sonà rùltima ora!
Stradon San Fermo, i Leoni, el Balon, i è tuto un torente che vien zo a rebaltoni investendo strade e vìcoli. Ai Filipini l’aqua l’è altissima. Al ponte Aleardi casca un pilon. EI Lungàdese Porta Vitoria l’è oramai fiume col fiume e l’aqua, ironpendo ne la Bra la brinca la ‘Rena, dopo aver impenì el VaI, e la vien fora da i busi come da un passapaste. Le roste a San Zen le se roèrsa e l’aqua, a ‘na velocità de tri metri al secondo, la mena distrussion fin a la porta del Palio. E continua a piòvar; ‘n altro diluvio universal! A le siè de sera. Par 8 dècimi Verona l’è inondà.
Tante case i è franà e tanti i gh’è restà de soto. Roti i ponti, roti i condoti del gas, la çità l’è al scuro, a la fame e a la desolassion.
L ‘idròmetro a le ondese de luni 25, el segna m. 4,28.
Ma eco che da sto momento, sia pur a pian, l’aqua la scominçia a calar e co’ i barconi del Genio e qualche barcheta se taca a portar aiuto a la popolassiòn. Da la Porta de i Borsari però no’ se passa gnancora; l’aqua l’è rivà quasi al colmo del vòlto. A la cesa de Santa Maria in Organo se çerca de salvar el bel candelabro intarsià, tiràndolo sù da l’alto de i copi, inbragà co’ le soghe.
Le tarsiè però i è in mòia. La sera del 26, Verona l’è negà soto 4 metri de aqua ma sta nassendo un filin de speransa.”
Intanto, sete case i è franà in via Sammicheli (Binastrova) e tre done le gh’è morte sòto. Gh’è el dubio par tanta altra gente che no’ se trova, forsi strapegà via da la tremenda corente.
Altre case i è andà zo a San Tomaso, a Sant’ Antonio, San Stefano, in via Scrimiari e al ponte de la ferovìa. È andà a farse benedir del tuto anca el ponte Aleardi (del çimitero), investì da un mar de macerie, comprese quele de 8 mulini, scadenà da i so pontoni e vegnù-zo a cascada. In parte se sbrìsola anca el ponte Navi, quel de la ferovìa e quel de l’aqua morta, più tuti quei su l’Adeseto.
Tante case i è crolà anca in Citadela. La sera de ‘ sto giorno nero se poI registrar però un calo de l’aqua de 30 cm. Durante la note, ne le strade scure, tra la desolassion e le rovine, splende a trati le tòrce a vento in sostitussion del gas andà in malora co’ l’esplosion de i tubi. Tra la generaI rovina, i soldà, àngeli de la salvessa, i se pròdiga oltre ogni lìmite uman.

GIOVEDI – 6,35 de la matina.

Durante la note è vegnù-zo tante altre case: invia Nova, ai Filipini, in stradon San Fermo, de drio a la ‘Rena, in corte Molon, piassa Erbe, ecc… Meiara de veronesi, sbandadi, desperadi, restà sensa gnente, i se mucia soto la Gran Guardia. A le 16,00 è rivà da Roma le autorità a constatar i dani. È rivà anca Umberto I, el “Re buono”, a portar conforto co’ la so presensa. A la sera l’idròmetro el segna m. 2,35 ma seguita a crolar case e fassade: a la pescarìa, ‘al massel e dintorni. No’ s’à mai savù el nùmaro esato de le vìtime, le più rugolà via in brasso ale onde, smissià a àlbari, travi, bestie, paioni e tòchi de mobilia carolà; pore robe che avea fato parte de ‘na casa; “la casa” che l’è tanta parte de la vita umana!
Da tuta l’Italia è rivà aiuti de coerte, paja suta e roba da magnar, cusì la note l’è rivà manco spaentosa anca se a la luce de le lanterne Verona la presenta ‘na vision da bolgia dantesca.

LA MATINA DEL 29 (vènardi).

El Ministro Baccarini l’à visità ancora la çità e la provincia martoriade, specie Legnago, Zevio e Albaredo. Intanto, col ritirarse de le aque, altre case le va zo. La Binastrova, el vecio quartier ‘dossà a San Tomaso, l’è adiritura sparì par sempre.
Crola anca la bela logeta del palasso Canossa e se vèrse voràgìni anca de tri e passa metri, dapartuto.
Man a man che l’ aqua la cala, la lassa un strato de melma scura de 25-30 cm. Al Municipio i organiza la distribussion del pan e qualchedun intanto se pèrtega le scale de la tor Lamberti par vedar, da l’alto de i so 83 metri, tuto intiero el tràgico spetàcolo de la çità ridota a ‘n aquitrin.
A’ sto punto, “sùcaro su le fraghe” al disastro de la piena se zonta anca quel del teramoto con altri dani in tuta la provincia.
Tuto intorno, ne la desolassion, stranbi spetàcoli; in Vìcolo Pulce, al n° 8, è restà sù un tòco de muro con tanto de finestra e vasi de fiori sul davansal; intati! Più in là, un fil tirado con desteso un vestito nero, sbrindelà… inbonbegà!
Co’ la tipografia del giornal “L’Adese”, è sparì par sempre sòto l’aqua, anca la “Borsalino”. La cesa de San Tomaso (Cantauriense), dove Mozart l’avea delissià i veronesi a l’armonio, firmàndolo a ricordo, l’è ‘na rovina; tuti i aredi, quadri, banchi, candelabri, confessionài, i s’à mucià su l’altar magior. La sabia l’è alta 50 cm. e i preti i ringrassia el Padreterno par ‘verghe scudelà quela al posto del fango.
I dani, al tempo, se i càlcola su l’ordine de 40 milioni e se pensemo che con un scheo se canpava ‘na giornada… !!!
Solo in Veroneta è franà ‘na çinquantina de case, a parte tute le altre e l’elenco de i morti no ‘l è mai stà conpletado.
Po’ Verona ancora una volta la s’à fato sù le màneghe e l’à ricostruì i so muri, le so strade, i so ponti, metendo finalmente a scudo e a guardia del “verde Adese”, belo ma tanto infido, i àlsari. Da la parte del ponte Piera, su un trato gh’è stà inserì “el toro” e ancora ‘desso quando l’aqua la lo passa, noialtri veronesi scominçiemo e scominçiaremo senpre a tremar.

EROISMO A SAN ZEN

Tante i è stà le storie de eroismo rivà fin a noialtri traverso el ponte de 120 ani. Una par tute. I lo ciamava “el pirla” par la so straordinaria agilità a far capriole in piassa. Parenti no ‘l ghe n’aveva; l’era un “piàtaro” de quei ‘bandonà ne la ruda del convento e l’era cressù par le strade. A 12 ani l’èra forte come un toreto e bon come el pan. Tra le seste del marcà el se dava da far par guadagnarse qualche palanca. L’èra amigo de tuti e tuti i ghe volea ben e i andava a gara a darghe qualcossa. Tra questi gh’era la Gegia, ‘na vecia frutaròla che a Santa Lussia la g’avea cronpà parfin un bel vestito novo “pignolà”, nel ghèto de i ebrèi. Da quel giorno la Gegia l’èra deventà el so Dio e lu, par ela, un fiol.
Quando è vegnù la piena i era in casa insieme su le Regaste San Zen. El “pirla” da prinçipio el g’à batù le mane ai spetacolari cavaloni del fiume che ghe passava sòto. Ma la Gegia la g’avea paura e po’ anca lu el s’à messo a piànsar quando l’aqua l’à scominçià a entrar da le finestrele. I s’à messo a sigar aiuto e un barcon de i militari l’à çercà, sensa riussirghe, de aviçinarse.
“Tasi, nona… “el ghe diseva” che i vegnarà a torne sù anca noialtri!” Intanto era calà la sera e la bicoca de la Gegia la tacava a trabalàr de bruto. Quasi tute le altre case de le Regaste i era stà sgonbrà e restava solo la sua; la piassè poareta e scancanà del rion. Po’, tuto de ‘n colpo, un scosson e l’è franà!
El “pirla”, che ‘l se la cavava a nodar, l’à brincà par un brasso la Gegia çercando de tegnerla fora da l’aqua fin che le fòrse no’ le gh’è mancà e, desperado, el l’à vista alontanarse in mèso a le onde.
In quela i soldà, aferà el buteleto, i è riussidi a tirarlo in salvo. Ma el “pirla” el s’à desvincolà butàndose da novo in aqua nel tentativo de salvar quela che par lu l’era “la nona”.
Cusì l’Adese el se i à portà via tuti du.

Wanda Girardi Castellani