L’Angolo de la Wanda – Settembre bis 2005 – “’Na domìnica longa un Passio”
…a cura di Graziano M. Cobelli
gcobelli05@gmail.com
Quatro Ciàcoe: da Verona
‘Na domìnica longa un Passio
Ci me conosse ben sa che l’è raro che tasa! l mei i m’à senpre dito che ò inparà a parlar prima de caminar… e ò caminà bonora.
Me papà, a ‘sto propòsito, el m’avea soranominà “Còribo” da “Coribante”; la marca de la prima radio rivà in casa Girardi; un soranome che, in fameja, el m’è restà incolado par tuta la vita.
Èssar costreta a tàsar l’è, dunque, par mi, quando la me càpita, ‘na tragedia… ‘na malatìa mortai!
Beh, ‘na domìnica de ‘sto magio-mato del 2005, che ‘I passa da i 25 gradi ai 15, dal sol che spaca a un cel nero come el calùsene, mi son stà da la matina a le 8, quando me neoda Elena (delegà de turno) la m’à fato I’apelo par vedar se par caso durante la note no’ sia ‘n dà a farme benedir, a le 22 (ora de l’altro apelo in cao la note) sensa far ‘na parola!
La malatìa che la me dà un fià de solievo, un giorno sì e n’altro nò, par quel giorno lì l’era decisamente al NO, cusì, si come ero a ris-cio de ‘ndar in tera a ogni passo, m’è tocà star par forsa in casa. Me fioi, giustamente, i era andà par i afari sòi, idem me fradel e no’ ò catà un can che rispondesse al telèfono ne un che ghe vegnesse la bela idea de darme un saludo, sia pur telegràfico! No’ sò se qualcheduno de voialtri abia fato n’esperiensa de ‘sto tipo: costreti a star soli, in casa, in ‘na giornada de sol, vardando da la finestra la gente che va a spasso, i buteleti che core e fa ciasso, le copie, giovani e anca vece che le va in cesa tegnendose par man e a mesodì spiar da le tendine la fameja de fronte, sentà a tòla co’ la mama che scudela la minestra… nel mentre el papà el finisse de lesar el giornal cicàndose un goto de bianco par pareciar el stòmego al pranseto domenical. Ti, intanto, che t’è perso anca I’ùltima nina de fame e gnanca te gh’è la voia de metarte sù un pignatin de qualcosa, te si lì a contar i minuti che i par ore e le ore che le par el “Passio” de vènare santo. La solitùdine, se la te salta ‘dosso, specie quando el cargo de i ani el taca a pesar, la salute la t’à molà e te te cati anca sensa el conpagno/a de la to vita, la fa tanto, ma tanto mal! l amissi co’ i quali te ‘ndavi fora in copia a far baraca, da quando te si un scàmpolo e malcunado, i à fato “fete” rifilàndote çerti àlibi che fa pietà. E pensar che ‘na olta, “guai la Maria” che se podea far sensa de ti… senpre pronta a metar-sù la teja par tuti, paredar, sparedar, contar barselete e a far le ore pìcole! Sì… lo sò ben che le robe i è cambià… che ‘desso se fasso vègnar le òndese me toca andar in leto vestì parche me riva el “bloco” che me inpedisse, oltre a tante altre robete, parfin de sbotonarme el vestito e cavarme le calse. E alora, lassemola còsar nel so brodo, sta Wanda, che oramai la… “rompe”!
Beh… passiensa, el mondo el va cusì!! Alora, qua, se trata de catar la maniera de ‘massar el tempo mèjo che se poi… evitando de pensar, a la facia de Cartesio che ‘I sostien che se esiste solo se se pensa.
Par prima roba m’è vegnù in mente che ai bei tenpi fasea i zugàtoli col pano Lenci… e parché no’ tornar a ‘sto bel’oby che ‘l me farìa anca risparmiar i schei par cromparghe el regal de conpleano a me neodeti?
Rebaltando mèsa casa ò alora catà de i tòchi de pano e, in mancansa del material adato, de l’altro adatàbile! La fòrbese no’ la tajava ma la smorsegava, ‘stesso, fasendo ‘na fadiga viliaca, son riussì a paredarme el stampo. La tragedia l’è scopià quando che ò tentà de infilar el cao ne la carnela de I’uda;… òstrega, de uce ghe ne vedea tre e va a capir qual che l’era el buso giusto! Le ucete pìcole, quele che ghe vorìa, no’ riesso po’ gnanca a tegnerle in man. Me n’è cascà do/tre par tera e no’ i ò catade più (de çerto le vegnarà fora la prima òlta che caminarò scalsa). Dài e dài, ò dovù a la fin-fine ciapar n’ucia de lana longa mèsa spana; arnese che se l’è vera che se poi passarghe drento el fil con manco fadiga, l’è anca vera che po’ te fè sul pano a ogni ponto, ansiche un buseto, ‘na finestrela.
Durante el laoro ò anca scoperto che ghe vedo mal, oltre che dopio e triplo. Dopo un’ora gaveo un mal de testa da tajar col cortei e ò dovù piantar lì!
A ‘sto punto, no’ podendo lesar, ò tacà mùsica ma la mùsica, spece quela che me piase a mi (Sibelius, Beethoven, Mozart, ecc…) la te riciama i pensieri e co’ i pensieri se inossa, in ‘sti casi, la più nera de le malinconìe. Te vien in mente la man che fin a poco tenpo fa vegnea çercar la tua… propio lì, su la poltrona de fianco e te par de sentir parfin el sampetar de la to cagneta,… anca ela andada ci-sa ‘ndove, forsi nel paradiso de i cani, come la me assicura I’amiga Luigina Tavi che de ‘ste robe la se ne intende! Cusì, no’ volendo capitonbolar ne i ricordi, te finissi col cascarghe drento a testa in zo! EI cor, come ‘n usel restà par massa tenpo presonier in te ‘na gabia, tuto de ‘n colpo libarà, el taca a svolassarte nel pèto, mulinàndote ne la mente e inondàndola de nostalgìa.
Intanto el tempo e! camina a passo de lumaga e la luce che te voressi vedar smorsarse in pressia la sèita a inpenirte la casa, fasendo risaltar sensa misericordia la pòlvar che no’ te gh’è ‘vudo voja de stanar, i muri che da sècoli no’ te ghè ‘vudo l’estro de rimpiturar.
Alora… càncaro de’n SOL, vuto propio guera? E mi te sbato sul muso le persiane, tiro le tende e sèro-sù le porte. A la TV no’ te cati un programa che no ‘l sia un quiz… ‘na partìa de balon, un “saloto” ‘ndo’ se parla solo de trojade e te vien co’ la furia de ‘n tenporal de istà, la voja de pianzar a sece roerse. Ma po’, come Dio voi riva la sera a vestir col veludo de le ombre tute le robe, mi compresa. Che domìnica da “Passio”!! Fortuna che la sta par finir. Un “Tavor” negà in te ‘na camamila e me sdravaco in leto ben decisa a no’ svejarme fin al manco a le 9. Eh… sì, un par de ore dopo ò verto i oci convinta che fusse matina e invéçe i era le una. E ci à dormi più? A un çerto punto me son sentà al me fido computer e ò smartelà su i tasti fin a le çinque… Sentà davanti al monitor inpissà, a quel’ora ò ciapà anca sono par po’ svejarme a le sete e mèsa con un mal de schena e un mal de col, che no’ ve digo; degno coronamento a ‘na dominica da “Passio”.
(Dèdico a tuti quei che sa… par averla proà.)
Wanda Girardi Castellani
