L’Angolo de la Wanda – Settembre ter 1999 – Premio “Giuseppe Lugo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Premio “Giuseppe Lugo”

Sto ano scade el çentenario da la nàssita del tenor veronese Giuseppe Lugo, par onorar el qual el 24 luio 1994 è stado istituì a Custoza el prestigioso premio dedicado ai tenori che magiormente i à contribuì a difondar nel mondo l’opera lirica, con particolar riferimento a quela italiana. Nel quadro de le manifestassioni, el 27 luio avemo inaugurà una mostra de foto, costumi e cimeli de Lugo, a vila Venier de Somacampagna (VR) e el 28 luio, a Vila Vento (Custoza) un concerto in so onor. EI Comitato, po’, l’à deciso ‘sto ano de consegnar el premio, precedentemente oferto ai tenori: Placido Domingo, Josè Carreras, Franco Corelli, Giuseppe di Stefano e Carlo Bergonzi, al Maestro Giuseppe Giacomini, in Arena, la sera del 11 agosto ‘pena passà.
GIUSEPPE GIACOMINI el s’à diplomà a l’Istituto Musical C. Pollini de Padova e l’à scominçià a la grande vinçendo vari inportanti concorsi internassionali. EI debuto el ghe l’à ‘vu a Vercelli nel 1967 ne la “Butterfly” de Puccini. Nei 33 ani de la so longa cariera artìstica l’à cantà in tuti i più famosi teatri del mondo, dal Metropolitan de New York, al Colon de Buenos Aires, al Coven Garden de Londra a l’Operà de Parigi, a la Scala de Milan, al San Carlo de Napoli, ecc… Nel mondo de la lìrica Giuseppe Giacomini l’è conossudo come el tenor dramatico italian, par ecelensa. La facilità, la morbidessa, e, nel stesso tenpo, la potensa de emission, l’à fato particolarmente adato a parti inpegnative come: Radames, Canio, Andrea Chenier, Calaf, Manrico e Otello.
A l’Arena de Verona l’à debutà nel 1978 nel Trovador de Verdi, soto la diression del Maestro Gianandrea Gavazzeni. Nel 1980-85-96 l’émo aplaudì in Aida, direto da Nello Santi e Daniel Oren. Nel 1989 l’à cantà ne “La forza del destino” de Verdi, soto la diression de Anton Guadagno e nel 1990, senpre co’ la diression de Daniel Ore, l’à rapresentà magistralmente Cavaradossi in’ na memorabile “Tosca ” .
In quei periodi areniani, l’à afiancà i soprani: Katia Ricciarelli, Maria Chiara, Linda Roark Strummer, Giovanna Casolla, e i mesosoprani Viorica Cortes, Fiorenza Cossotto, Bruna Baglioni e Dolora Zajick. Memorabili: el so Otello e el so Canio, al nostro teatro Filarmonico. Sior de’n repertorio de ben 28 opere, l’à fato prestigiose registrassioni e video: “Fausta” de Donizetti (1981), “La forza del destino” al Metropolitan de New Jork (1983), “Tosca”, soto la diression del Maestro Muti e inoltre un maraveioso “Don Carlo” per la TV francese, a Bordeaux nel 1991.

Wanda Girardi Castellani